डोंबिवलीत गतिमंद महिलेवर अत्याचार
रिक्षाचालकाला अटक, चार दिवसांची पोलिस कोठडी
सकाळ वृत्तसेवा
डोंबिवली, ता. १० : डोंबिवली पूर्वेतील एका ३० वर्षीय गतिमंद महिलेवर रिक्षाचालकाने अत्याचार केल्याची घटना उघडकीस आली आहे. याप्रकरणी टिळकनगर पोलिस ठाण्यात पीडितेच्या आईने तक्रार दाखल केली आहे. दाखल तक्रारीनुसार पोलिसांनी रिक्षाचालक फैजल खान (वय २१) याच्याविरोधात गुन्हा दाखल करीत तत्काळ बुधवारी (ता. ९) रात्री त्याला ताब्यात घेत अटक केली. गुरुवारी कल्याण जिल्हा सत्र न्यायालयात त्याला हजर केले असता न्यायालयाने चार दिवसांची पोलिस कोठडी सुनावली आहे.

डोंबिवलीत एका ३० वर्षीय गतिमंद महिलेवर रिक्षाचालकाने अत्याचार केल्याची संतापजनक घटना समोर आली आहे. ही गतीमंद महिला आपल्या नातेवाइकांकडे जात होती. या वेळी रिक्षाचालकाने तिला अज्ञात ठिकाणी नेऊन अमानुष कृत्य केले. या गतिमंद महिलेने घडलेला प्रकार सोमवारी (ता. ७) आपल्या आईला सांगितला. यानंतर बुधवारी (ता. ९) पीडितेच्या आईने टिळकनगर पोलिस ठाणे गाठत मुलीवर अत्याचार झाल्याची तक्रार दाखल केली. दाखल तक्रारीनुसार पोलिसांनी तपास सुरू केला. सीसीटीव्हीच्या आधारे व तांत्रिक बाबी तपासून पोलिसांनी रिक्षाचालक फैजल याला बुधवारी रात्री अटक केली. गुरुवारी कल्याण जिल्हा सत्र न्यायालयात त्याला हजर केले असता १४ एप्रिलपर्यंत त्याला पोलिस कोठडी सुनावली आहे. या प्रकरणाचा अधिक तपास पोलिस करीत आहेत.