भाईंदर, ता. १० (बातमीदार): मिरा-भाईंदर महापालिका बांधणार असलेल्या मिरा रोड येथील वादाच्या भोवऱ्यात सापडलेल्या रस्त्याचे प्रस्तावित काम रद्द करण्यात आले आहे. या रस्त्याच्या कामावरून वाद निर्माण झाला होता. रस्त्याच्या कामामुळे झाडे तोडावी लागणार होती, तसेच एका विकसकाच्या फायद्यासाठी रस्ता बांधला जात असल्याचा आरोपही करण्यात आला होता.

मिरा रोड येथील उद्यानाचे आरक्षण असलेल्या जागेत तरण तलाव बांधण्याचा महापालिकेचा प्रस्ताव होता. या तरण तलावाभोवती नऊ मीटर रुंद रस्त्याचे बांधकाम केले जाणार होते, मात्र रस्त्याच्या कामामुळे २० झाडांचा बळी दिला जाणार होता. झाडे तोडण्याची नोटीस महापालिकेकडून जाहीर होताच पर्यावरणप्रेमींमध्ये नाराजीचे वातावरण निर्माण झाले. त्यांनी झाडे तोडायला विरोध केला, तर दुसरीकडे हा रस्ता एका खासगी विकसकाला फायदा मिळवून देण्यासाठी बांधला जात असल्याचाही आरोप होऊ लागला. अखेर महापालिका प्रशासनाने रस्त्याचे कामच रद्द करण्याचा निर्णय घेतला आहे.

राज्य सरकारच्या विशेष निधीतून या ठिकाणी तरण तलाव बांधण्यात येणार होता, मात्र तरण तलावाचे काम अन्यत्र करण्याचा निर्णय राज्य सरकारने घेतला आहे. परिणामी या ठिकाणी बांधण्यात येणाऱ्या तरण तलावाचे काम यापूर्वीच रद्द करण्यात आहे. त्यामुळे त्या ठिकाणी रस्ता बांधण्याची व झाडे काढण्याची आवश्यकताच उरलेली नाही, असे प्रसिद्धिपत्रक मिरा-भाईंदर महापालिकेचे शहर अभियंता दीपक खांबित यांनी काढले आहे.