सकाळ वृत्तसेवा
ठाणे, ता. १० ः गायमुखवरील कचऱ्याला आग लागल्याने मंगळवारी रात्री ठाणेकरांची धुराने घुसमट झाली होती. त्यामुळे ठाणे महापालिकेने गायमुख येथील कचरा उचलण्याचा निर्णय घेतला आहे, पण सीपी तलाव सकंलन केंद्रावरील कचरा उपसण्याचे काम संथ गतीने सुरू असल्याने गायमुखवरील कचरा उचलण्याची प्रक्रिया लांबणीवर पडण्याची शक्यता आहे.
कचरा कोंडीने ठाणेकरांच्या नाकीनऊ आले असून, ठाणे पालिका प्रशासनही सर्व आघाड्यांवर झुंजत आहे. एकीकडे ठाणेकरांचा संताप, तर दुसरीकडे राजकारण्यांच्या असहकार्यामुळे शहरातील कचऱ्याचा प्रश्न अधिक किल्ष्ट झाला आहे. सीपी तलाव, मुल्ला बाग, गायमुख येथील कचरा संकलन केंद्रांना विरोध वाढला आहे. त्यापैकी सीपी तलाव संकलन केंद्रातील कचऱ्याला दोन वेळा आग लागली. उपमुख्यमंत्री एकनाथ शिंदे यांच्या मतदारसंघातच कचऱ्याचा प्रश्न चिघळल्याने पालिका प्रशासनाने युद्धपातळीवर येथील कचरा उपसण्यास सुरुवात केली, मात्र १५ दिवसांपासून उपसा सुरू असूनही कचऱ्याचे डोंगर हटत नसल्याचे ‘सकाळ’ने केलेल्या पाहणीतून दिसून आले आहे. महत्त्वाचे म्हणजे, गायमुखच्या वनक्षेत्रातील कचराभूमीला आधीपासूनच लोकप्रतिनिधी तसेच पर्यावरणप्रेमींचा विरोध होता. अशातच येथील कचऱ्याला मंगळवारी रात्री आग लागल्याने हा परिसर कचरामुक्त करण्याचा निर्णय पालिकेने घेतला आहे, पण सीपी तलाव येथील कचरा हटवल्यानंतरच गायमुख येथील कचरा हटवला जाणार असल्याने विलंब होण्याची शक्यता आहे.
------------------------------------------------
धुराचे लोट रस्त्यावर
गायमुख येथील कचराभूमीला लागलेल्या आगीवर नियंत्रण मिळवण्यात ठाणे पालिकेच्या अग्निशमन दलाला जरी यश आले असले तरी संपूर्ण परिसरात धुराची चादर परसलेली आहे. दोन दिवसांपासून कचऱ्याला लागलेल्या आगीतून येणारा धूर थांबलेला नाही. त्यामुळे दुर्गंधीबरोबर आता धुराचे लोट महामार्गावरही आला आहे. त्यामुळे येथून प्रवास करणाऱ्यांना विविध अडचणींचा सामना करावा लागत आहे.
-------------------------------------------------
विल्हेवाट प्रकल्पाची प्रतीक्षा
गायमुख येथे ओल्या कचऱ्यापासून खतनिर्मितीचा प्रकल्प सुरू करण्यात येणार आहे. त्याचे काम अंतिम टप्प्यात असले तरी प्रकल्प सुरू होण्यास साधारण एक वर्षाचा कालावधी लागणार असल्याची माहिती पालिका अधिकाऱ्यांनी दिली आहे.