खोदून ठेवलेल्या चेंबरमुळे अपघाताचा धोका
उरण, ता. १० (वार्ताहर) ः उरण शहरातील रहदारीच्या ठिकाणी अनेक दिवसांपासून चेंबरच्या दुरुस्तीच्या खोदकाम करून ठेवले आहे. या खड्ड्यामुळे अपघाताचा धोका निर्माण झाला आहे. त्यामुळे रस्त्याच्या मधोमध केलेल्या खोदकामाची त्वरित दुरुस्ती करण्याची मागणी नागरिकांकडून करण्यात येत आहे.
उरण नगरपालिका अधिकाऱ्यांच्या दुर्लक्षामुळे शहरवासीयांना समस्यांनी ग्रासले आहे. कचरा समस्या, वाहतूक कोंडी तर पाण्याच्या अशा विविध समस्यांना नागरिकांना तोंड द्यावे लागत आहे. काही दिवसांपूर्वी पाण्याचा चेंबरचे खोदकाम दुरुस्तीच्या नावाखाली केले होते. सद्यःस्‍थितीत हे चेंबर असेच पडून आहे. त्याचा त्रास नागरिकांसह वाहनचालकांना होत आहे. शिवाय हे चेंबर रस्त्याच्या मधोमध असल्याने अपघाताचा धोकादेखील वाढला आहे. हा रस्‍ता रहदारीचा असल्याने चेंबरमुळे वाहतूक कोंडीदेखील होते. त्‍यामुळे नगर पालिका प्रशासनाने या चेंबरचे काम लवकरात
लवकर करून तो बुजविण्यात यावा, अशी मागणी नागरिकांकडून केली जात आहे.