सकाळ वृत्तसेवा
ठाणे, ता. १० ः रस्ते आणि फुटपाथ अडवून हातगाडी लावणाऱ्या फेरीवाल्यांवर गुन्हे दाखल करण्याचे सत्र ठाणे पोलिसांनी सुरू केले आहे. याअंतर्गत एकाच दिवशी विविध पोलिस ठाण्यांमध्ये डझनभर गुन्हे दाखल करण्यात आले आहेत.
ठाणे शहरासह जिल्ह्यात फेरीवाल्यांचे प्रस्थ दिवसेंदिवस वाढत चालले आहे. अशा फेरीवाल्यांवर पालिकेचे अतिक्रमण विभाग कारवाई करते; पण आता पोलिस प्रशासनानेदेखील रस्ते वाहतुकीस अडथळा ठरणाऱ्यांवर गुन्हे दाखल करण्यास सुरुवात केली आहे. ठाणे आयुक्तालयात एकाच दिवशी डझनभर गुन्हे दाखल झाले आहेत. यामध्ये वर्तकनगर येथील भीमनगर परिसरात, उन्नती इमारतीच्या समोर शिवाईनगर येथे, कासारवडवली पोलिस ठाण्याच्या हद्दीत भाजीपाला विक्रेत्यांवर, वागळे इस्टेट पोलिस ठाण्यामध्ये महावीर जैन हॉस्पिटलजवळ पाणीपुरी विक्री करणाऱ्यांवर गुन्हा दाखल करण्यात आला आहे. याचबरोबर खडकपाडा, डोंबिवली, उल्हासनगर, बदलापूर, मुंब्रा परिसरात पोलिसांनी कारवाई केली आहे.