मध्य रेल्वेचा पायाभूत सुविधांवर भर
विविध स्थानकांवर १४ नवे एफओबी
सकाळ वृत्तसेवा
 मुंबई, ता. १० : रेल्वे प्रवाशांच्या सुविधेसाठी मध्य रेल्वेने २०२४-२५ या आर्थिक वर्षात पायाभूत सुविधांवर भर दिला. विविध स्थानकांवर १४ नवे फूट ओव्हर ब्रिज (एफओबी) उभारून सुलभ प्रवासाचा मार्ग उपलब्ध केला आहे. यासोबतच स्थानकाचा पुनर्विकास, ट्रॅक अपग्रेडेशन, वेगवाढ, पुलांचे पुनर्वसन आणि मानवी लेव्हल क्रॉसिंग हटवण्यासारख्या कामातही रेल्वेने भरीव प्रगती केली आहे.
मध्य रेल्वेने मुंबई विभागात गोवंडी, खांडी, बदलापूर, कामण रोड; भुसावळमध्ये अंकई; नागपूरमध्ये तिगाव, पांढुर्णा, भरतवाड़ा आणि पुणे विभागात येवला, निंबलक, अकोलनेर, विळद, पाटस येथे हे पूल उभारण्यात आले. तसेच अतिक्रमण रोखण्यासाठी वडाळा-किंग्ज सर्कल, गोवंडी-मानखुर्द आणि शहाड-आंबिवली दरम्यान उपनगरी विभागात तीन एफओबी तयार करण्यात आले आहेत.
--
स्थानकांचा पुनर्विकास
छत्रपती शिवाजी महाराज टर्मिनस, नागपूर आणि अजनी येथे पुनर्विकासाचे काम वेगाने सुरू आहे. २२ स्थानकांवर सुधारणा, नाशिकरोड स्थानकाच्या दर्शनी भागात सुधारणा, होटगी येथे उच्चस्तरीय प्लॅटफॉर्म आणि खंडवा स्थानकावर नवीन प्रतीक्षालय व बुकिंग कार्यालय उभारण्यात आले आहे.
----