महालक्ष्मी उड्डाणपुलावर दुचाकी अपघात
कासा, ता. ११ (बातमीदार) : मुंबई-अहमदाबाद महामार्गावरील महालक्ष्मी उड्डाणपुलावर शुक्रवारी सकाळी साडेनऊ वाजण्याच्या सुमारास एक दुचाकी अपघात झाला. चारोटीहून तलासरीकडे जात असलेल्या वरखंडे येथील वाहतूक पोलिस मधुकर घोडले यांच्या दुचाकीला मागून भरधाव वेगात येणाऱ्या एका अज्ञात टँकरने जोरदार धडक दिली. धडकेमुळे घोडले यांची दुचाकी रस्त्यावर कोसळली आणि त्यांच्या पायाला गंभीर जखम झाली. सुदैवाने मोठा अनर्थ टळला. घटनेची माहिती मिळताच घोटल येथील रुग्णवाहिकाचालक राजेश भोईर व त्यांचे साथीदार काही वेळातच घटनास्थळी दाखल झाले आणि जखमी घोडले यांना तत्काळ कासा उपजिल्हा रुग्णालयात दाखल करण्यात आले. अपघातानंतर अज्ञात टँकरचालक घटनास्थळावरून फरार झाला असून, पोलिस अधिक तपास करीत आहेत.