ज्ञानकेंद्राच्या ठिकाणी चोख व्यवस्था ठेवा!

कल्याण, ता. ११ (वार्ताहर) : कल्याण पूर्वेतील भारतरत्न डॉ. बाबासाहेब आंबेडकर ज्ञानकेंद्राच्या लोकार्पण सोहळ्याच्या पूर्वतयारीच्या कामांची आढावा बैठक महापालिका आयुक्त अभिनव गोयल यांच्या दालनात आज सकाळी पार पडली. या वेळी आयुक्तांनी या ठिकाणी होणाऱ्या गर्दीचे पोलिसांच्या मदतीने नीट नियोजन करावे, ज्ञानकेंद्राच्या मार्गावर दिशादर्शक फलक लावावा. ज्ञानकेंद्राचे काम पूर्ण झाले आहे का, याची शहानिशा करावी. कार्यक्रमस्थळी रुग्णवाहिका व वैद्यकीय पथक तैनात ठेवावे. जनरेटर व विद्युत व्यवस्था चोख ठेवावी. अग्निशमन दलानेदेखील आपल्या गाड्या पूर्वतयारीनिशी सज्ज ठेवाव्यात, अशा सूचना संबंधित अधिकारीवर्गास दिल्या.