भिवंडी, ता. १३ (बातमीदार): भिवंडी आगारात परिवहनच्या गाड्यांसह खासगी गाड्यादेखील भंगार स्वरूपात उभ्या आहेत, पण आगारात पुरेशी सुरक्षा व्यवस्था नसल्याने विपरीत घटना घडण्याची शक्यता नाकारता येत नाही. त्यामुळे भंगार गाड्यांची विल्हेवाट लावताना आगारातील सुरक्षा यंत्रणा वाढवावी, अशी मागणी शिवसेना ठाकरे गटाच्या वतीने भिवंडी आगार व्यवस्थापकांकडे केली आहे.
काही दिवसांपूर्वी स्वारगेट आगारात महिला अत्याचाराची घटना घडली आहे. त्याचे स्वरूप पाहता भिवंडी आगारात काही अनुचित घटना घडू नये, यासाठी शिवसेना उद्धव बाळासाहेब ठाकरे पक्षाच्या पदाधिकाऱ्यांनी शुक्रवारी भिवंडी आगार व्यवस्थापकांची भेट घेतली. या वेळी आगारात २४ तास पोलिस बंदोबस्त असावा. बसस्थानकाच्या नूतनीकरणाबाबत कामांना चालना द्यावी. संपूर्ण बसस्थानक पेव्हर ब्लॉक लाऊन किंवा काँक्रीटीकरण करून सुशोभित करावे, बसस्थानकावर रंगरंगोटी करून गावांचे आणि थांब्याच्या नावाचे फलक ठळक अक्षरात करावे, बसस्थानकातील उपहारगृहात स्वच्छ, सुंदर करण्याची मागणी करण्यात आली. या वेळी भिवंडी जिल्हा प्रमुख मनोज गगे यांच्या नेतृत्वाखालील शिष्टमंडळाने भिवंडी बसस्थानकाचे आगारप्रमुख इरफान पटेल यांना निवेदन दिले. या वेळी महिला जिल्हा संघटक वैशाली मेस्त्री, जिल्हा सचिव राजेंद्र पुण्यार्थी, सचिव नितेश दांडेकर, समन्वयक रमेश नाईक उपस्थित होते.