किन्हवली, ता. १३ (बातमीदार)ः मुंबई-नाशिक महामार्गाचे चौपदरीकरण झाल्यापासून खातीवली-वासिंद येथे उड्डाणपूल बांधण्याची मागणी होती. यासाठी स्थानिकांनी तब्बल आठ वर्षे पाठपुरावा केला होता. अखेर महामार्ग प्रशासनाने उड्डाणपुलाचे काम सुरू केल्याने ग्रामस्थांमध्ये समाधान आहे.
खातीवली येथील शुभवास्तू गृहसंकुलाकडे जाणाऱ्या चौफुलीजवळ उड्डाणपूल नसल्याने शेकडो अपघात झाले आहेत, तसेच अनेकांना कायमचे अपंगत्व आले आहे. विशेष म्हणजे बहुतांशी अपघात हे दुचाकीस्वारांचे झालेले आहेत. त्यामुळे खातीवली ग्रामपंचायत हद्दीत उड्डाणपूल बांधण्याच्या मागणीसाठी नाशिक येथील महामार्ग प्रशासनातील अधिकाऱ्यांची तीन वर्षांपूर्वी भेट घेतली होती. मात्र महामार्ग प्रशासन तसेच संबंधित कंत्राटदार खातीवली उड्डाणपुलाबाबत निरुत्साही असल्याने खातीवली माजी उपसरपंच साईप्रसाद काबाडी, ग्रामस्थ प्रशांत महाजन, एकनाथ तारमळे यांनी महामार्ग प्रशासनाकडे आंदोलने, उपोषण, पत्रव्यवहार सुरूच ठेवला होता. अखेर या आंदोलनांची दखल घेत महामार्ग प्रशासनाने खातीवली-वासिंद येथील चौफुलीवर उड्डाणपुलाच्या कामाला सुरुवात केली आहे.