वाशी, ता. १३ (बातमीदार) : नवी मुंबईतील काँक्रीटीकरणाची सुरू असणारी कामे, मलनिस्सारण वाहिन्या, महानगर गॅसची पाइपलाइन, पाण्याची पाइपलाइन, भूमिगत विद्युत वाहिन्या, पदपथ, गटार दुरुस्ती आदी विकासकामे सुरू आहेत. या कामांसाठी ठिकठिकाणी रस्ते खोदून ठेवण्यात आल्यामुळे नवी मुंबईकर हैराण झाले आहेत. रस्ते खोदून ठेवण्यात आल्यामुळे वाहतूक कोंडी होऊन दुचाकी, चारचाकी वाहनचालकांनी संताप व्यक्त केला आहे. पादचाऱ्यांना रस्त्याने चालणेदेखील जिकिरीचे झाले आहेत.
रस्त्यांच्या काँक्रीटीकरणाची कामे सुरू असताना कामाचा भाग पूर्णपणे बंद करण्यात येत आहे. कामांच्या ठिकाणी रस्ता बंद असल्याचा फलकदेखील लावण्यात न आल्यामुळे वाहनचालकांना पुढे जाऊन पुन्हा मागे फिरावे लागत आहे. घणसोली येथील पाम बीच रस्त्यावर आगरी चौक ते निरंकारी चौकापर्यंत रस्त्याचे काम सुरू आहे. कोपरखैरणे ते वाशी येथील मार्गावर रस्त्याचे काम सुरू आहे. ज्या ठिकाणी रस्त्याची कामे सुरू आहेत. ती कामे संथ गतीने पार पडत असल्यामुळे वाहनचालकांना व पादचाऱ्यांना रोजच्या मार्गामध्ये बदल करावा लागत आहे. कामांच्या ठिकाणी रस्त्यावरील वाळू, सिमेंट भुशाची कस पडलेली दिसून येत आहे.
------------------
रस्त्यात खड्डे, पदपथावर डेब्रिज
महापालिका, महावितरण, महानगर गॅस आदी कंपन्यांचा एकमेकांशी विचारविनिमय नसल्यामुळे रस्ते वारंवार खोदण्यात येतात. एखाद्या वेळी विद्युतपुरवठा खंडित झाला, तर ज्या ठिकाणी समस्या झाली आहे, ते शोधण्यासाठी रस्ता खोदण्यात येतो. रस्ते खोदल्यांनतर ते पूर्णपणे व्यवस्थित बुजवण्यात येत नसल्यामुळे रस्त्यांमध्ये खड्डे तसेच राहतात. रस्त्यांची कामे सुरू असताना पदपथावर रस्त्यांतील डेब्रिज टाकण्यात येते. त्यामुळे रस्त्यांची कामे लवकरात लवकर पूर्ण करण्यात यावीत, अशी मागणी नागरिकांकडून करण्यात येत आहे.
--------------
नवी मुंबई शहरातील रस्त्यांची कामे सुरू आहेत. त्या ठिकाणी ठेकेदाराला फलक लावण्याच्या सूचना देण्यात येतील. ठेकेदाराने फलक लावण्यास कुचराई केल्यास त्यांच्यावर कारवाई करण्यात येईल. रस्त्याची कामे लवकरात लवकर पूर्ण करण्याचा प्रयत्न आहे.
- शिरीष आरदवाड, शहर अभियंता, महापालिका