कासा, ता. १३ (बातमीदार) : मुंबई-अहमदाबाद महामार्गावर शनिवारी (ता. १२) दुपारी एकच्या सुमारास बटाटा भरलेला ट्रक उलटल्याची घटना घडली. गुजरातहून मुंबईकडे निघालेल्या या ट्रकवरील चालकाचे वाडा-खडकोना येथील वळणावर वाहनावरील नियंत्रण सुटले, त्यामुळे ट्रक रस्त्याच्या कडेला असलेल्या खड्ड्यात कोसळला. अपघातात ट्रकचालक दिलीपसिंग चौहान आग्रा याला किरकोळ दुखापत झाली आहे. टोलनाक्यावरून घटनास्थळी दाखल झालेल्या रुग्णवाहिकेतून तातडीने प्रथमोपचार देण्यात आला; मात्र ट्रकमधील बटाट्यांचे मोठ्या प्रमाणात नुकसान झाले आहे. घटनेची माहिती मिळताच कासा पोलिस आणि महामार्ग पोलिसांनी घटनास्थळी धाव घेतली. दरम्यान, काही स्थानिक वाटसरूंनी रस्त्यावर विखुरलेले बटाटे उचलण्याचा प्रयत्न केल्याचेही निदर्शनास आले. महामार्गावर सध्या वाहतूक सुरळीत आहे.