समुद्रात अडकलेल्या चौघांची सुखरूप सुटका
पिरवाडीत जीवघेणा थरार

उरण, ता. १३ (वार्ताहर) ः उरण तालुक्यातील नागाव-पिरवाडी किनारपट्टीजवळील समुद्राच्या मध्यभागी चार तरुण भरतीच्या पाण्यात अडकल्याने पाण्याचा वेग आणि खडकाळ रचना यामुळे त्यांच्या जीवाला धोका निर्माण झाला होता. घटनेचे गांभीर्य लक्षात घेऊन सागररक्षक दलाने तत्काळ बोट घेऊन समुद्रात प्रवेश करून चार तरुणांना सुरक्षित किनाऱ्यावर आणले.
बचावलेल्या तरुणांची नावे शैलेश काटे (वय २२), सुमेध मिश्रा (वय २४), सागर नावणे (वय २४) आणि सुमेध अवस्कर (वय २२) अशी आहेत. हे सर्व जण नवी मुंबईतील ऐरोलीचे रहिवासी आहेत. सागररक्षक दलाच्या तत्पर आणि धाडसी कार्यामुळे मोठी दुर्घटना टळली आणि चार तरुणांचे प्राण वाचले. बचावकार्याच्या वेळी समुद्राला उधाण होते, लाटा जोरात धडकत होत्या आणि संपूर्ण परिसर खडकाळ असल्यामुळे मदतकार्य करणे अत्यंत धोकादायक होते. सागररक्षक दलातील अधिकारी, कर्मचाऱ्यांनी जीवाची पर्वा न करता बचावकार्य सुरू केले. या घटनेनंतर स्थानिक प्रशासन आणि सागररक्षक दलाने पर्यटकांना समुद्रात उतरताना काळजी घेण्याचे आणि अधिकृत मार्गदर्शनाशिवाय खोल समुद्रात जाणे टाळण्याचे आवाहन केले आहे.