टोकावडे, ता. १५ (बातमीदार)ः आधुनिक युगातही ग्रामीण भागात मातीच्या चुलीला मोठ्या प्रमाणात मागणी वाढत असल्याचे दिसून येत आहे. आधुनिकीकरणामुळे स्वयंपाकघरात विविध साधने आली असली तरी ग्रामीण भागात मात्र मातीच्या चुलीचे महत्त्व आजही कायम आहे.
ग्रामीण भागातील चुलीवरचे जेवण अनेकांना भुरळ घालते. त्यामु‍ळेच स्वादिष्ट जेवण जेवण्यासाठी ग्रामीण भागातील खानावळीमध्ये अनेक जण हजेरी लावतात. गावागावात आजही चुलीवरच जेवण बनवले जात असल्याने अनेक गृहिणी मातीची चूल खरेदी करताना दिसतात. पारंपरिक स्वयंपाक पद्धतीमध्ये चुलीला खूपच महत्त्व आहे. त्यात आता एका सिलिंडरसाठी ८५८ रुपये मोजावे लागत असल्याने ग्रामीण भागात स्वयंपाकासाठी पुन्हा पारंपरिक मातीच्या चुलीचा वापर वाढला असल्याचे दिसत आहे. त्यामुळे आजही अनेक ग्रामीण भागात कुभांर व्यावसायिक मातीच्या चूल बनवण्यात मग्न झाले आहेत.
-------------------------------------------
२५० ते ३०० रुपयांना विक्री
चिकन वाट माती आणि ती दोन ते तीन दिवस पाण्यात भिजवावी लागते. त्यानंतर भिजलेली माती योग्य प्रकारे मळून घ्यावी लागते. एक चूल बनविण्यासाठी माती भिजवणे, मळणे, कुंभ लावणे आणि नंतर कोरणे यासाठी दोन ते तीन दिवस कालावधी लागतो. एका चुलीची किंमत २५० ते ३०० रुपये आहे. आजही अनेक गृहिणी मातीची चूल मोठ्या प्रमाणात खरेदी करत असल्याचे विक्रेते सांगतात.