भिवंडी, ता. १५ (बातमीदार) : भिवंडी-निजामपूर शहर महापालिका क्षेत्रात शौचालयासारख्या मूलभूत गरजेसाठीही नागरिकांना निर्धारित शुल्कापेक्षा जास्त पैसे मोजावे लागत आहेत. त्यामुळे शहरातील कामगार आणि गोरगरिबांना आर्थिक भुर्दंड बसत असल्याचा आरोप केला जात आहे.
भिवंडी शहर हे कामगारांचे शहर असून येथे मोठ्या संख्येने झोपडपट्टी आहे. शहरातील बहुतांश शौचालयांचे ठेके निर्मल फाउंडेशन नावाच्या संस्थेला देण्यात आले आहे. याशिवाय बहुजन विकास संस्था आणि आदर्श सामाजिक सेवा संस्थाही अनेक शौचालये चालवत आहेत, पण त्यासाठीचा करार २०१०-१२ च्या जुन्या अटींवर आधारित असून, कंत्राटदारांना सुविधेसाठी प्रतिव्यक्ती १ ते २ रुपये आकारण्याची परवानगी आहे, पण ठेकेदार ३ ते ५ रुपये वसूल करत असून, शौचालय विभागाचा ठेका मिळवण्यासाठी लाखो रुपयांची बोली लावली जात असल्यानेच अशा प्रकारे मनमानी वसुली करत असल्याचा आरोप होत आहे.
-------------------------------------------------
पालिकेकडून यंत्रणा तैनात
शहरातील झोपडपट्टी भाग आणि यंत्रमाग कारखाने या सह शहरात कार्यरत असलेल्या एकूण ३९२ सार्वजनिकपैकी २०२ शौचालये विविध संस्था आणि ठेकेदारांकडून नियंत्रित केली जातात, तर उर्वरित १९० शौचालये महापालिकेच्या स्वच्छता कर्मचाऱ्यांकडून चालवली जातात, तर व्यवस्थापन, तपासणीसाठी २७८ सफाई कामगार, पाच चालक, २५ लिपिक यांच्यासह मुख्य अधिकाऱ्यांची नियुक्ती करण्यात आली आहे.
------------------------------------
‘हेल्पलाइन क्रमांक जारी करा’
सार्वजनिक शौचालये महापालिकेच्या अधिकाऱ्यांनी ठेकेदारांकडून तत्काळ आणि प्रभावीपणे स्वच्छ करावीत. तसेच प्रत्येक ठिकाणी निर्धारित सेवा शुल्काची स्पष्ट माहिती असलेला फलक लावावा. तसेच कंत्राटदारांकडून होणाऱ्या बेकायदेशीर वसुलीवर प्रभावीपणे लक्ष ठेवण्यासाठी पालिकेने एक हेल्पलाइन क्रमांक जारी केला पाहिजे, अशी मागणी केली जात आहे.