वीजबिल वेळेत भरण्याचे महावितरणचे आवाहन
मुलुंड, ता. १५ (बातमीदार) ः मुलुंडमध्ये घरगुती, व्यावसायिक आणि औद्योगिक ग्राहकांना मार्च २०२५ मध्ये ५४.८२ कोटींची वीजदेयके ग्राहकांना देण्यात आली होती. त्यामधील ५३.६९ कोटी रुपयाची वसुली झाली असून, उर्वरित १.१३ कोटीची बिले प्रलंबित आहेत. ग्राहकांनी वेळेत बिले भरणे आवश्यक आहे. अन्यथा नाइलाजास्तव ग्राहकांचा वीजपुरवठा खंडित करावा लागेल, असा इशारा महावितरणने दिला आहे. मुलुंडमध्ये वीजग्राहकांची तब्बल १.१३ कोटी रुपयांची एकूण थकबाकी (मागील व चालू देयकांची) आहे.
मुलुंडमध्ये कार्यकारी अभियंता राजेश थूल यांच्या मार्गदर्शनाखाली वीजचोरीविरुद्ध धडक मोहीम राबविण्यात येत असून, वीजचोरीची प्रकरणेही आढळून आली आहेत. त्यांच्यावरही कडक कारवाई करण्यात येईल, असे मुलुंड पूर्व महावितरणचे अतिरिक्त कार्यकारी अभियंता दीपक जाधव यांनी सांगितले. मुलुंडमध्ये लोडशेडिंग नसल्याचा दावा महावितरणचे कार्यकारी अभियंता राजेश थूल यांनी केला आहे.