वाशी, ता. १५ (बातमीदार) : नवी मुंबई महापालिकेच्या सीबीएसई बोर्डाच्या शाळांना उत्स्फूर्त प्रतिसाद मिळत आहे. २०२५-२६ या शैक्षणिक वर्षात नर्सरी ते आठवीपर्यंतच्या वर्गासाठी प्रवेश अर्ज मागवण्यात आले होते. या शाळांमध्ये एकूण ४१५ विद्यार्थ्यांना प्रवेश दिला जाणार आहे. या ४१५ जागांसाठी १,३०० अर्ज आले आहेत. त्यामुळे शिक्षण विभागाच्या वतीने या अर्जाची छाननी सुरू करण्यात आली आहे.
नवी मुंबई महापालिकेच्या वतीने पालिका हद्दीत एकूण तीन सीबीएसई बोर्डाच्या शाळा चालविल्या जातात. एक सीवूड्स विभागात, दुसरी कोपरखैरणेमध्ये आणि तिसरी शाळा ही नेरूळ सारसोळेमध्ये सुरू करण्यात आली आहे. या शाळांमधे मोफत प्रवेशाबरोबर, मोफत शैक्षणिक साहित्य आणि मोफत शिक्षण दिले जात आहे. यासाठी कोणत्याही प्रकारचे शुल्क आकारले जात नाही, शिवाय या शाळांचा शैक्षणिक दर्जाही उत्तम आहे. त्यामुळे दरवर्षी या शाळांना पसंती वाढत आहे. शाळेत प्रवेश घेणाऱ्या विद्यार्थ्यांची संख्याही वाढत आहे; मात्र शाळेत प्रवेश मर्यादित आहे. या शाळेत प्रवेशासाठी केलेल्या अर्जानुसार त्यांची छाननी केली जात आहे. अर्ज केलेल्या विद्यार्थ्यांच्या घरी जाऊन त्यांची पडताळणी, चौकशी केली जात आहे. ती पूर्ण झाली की प्रवेश दिला जाणार आहे. विद्यार्थ्यांची यादी एप्रिल महिन्याच्या अखेरपर्यंत जाहीर केली जाणार असल्याची माहिती शिक्षण मंडळाच्या अधिकाऱ्यांनी दिली.