शिक्षक-पदवीधर सिनेटचे आंदोलन काढले मोडीत
पोलिसी बळाचा वापर केल्याने संताप
मुंबई, ता. १५ : नुकत्याच झालेल्या अर्थसंकल्पीय सिनेट सभेनंतर विद्यापीठ प्रशासनाने शिक्षक आणि पदवीधर सिनेट सदस्यांचे म्हणणेच ऐकूण घेण्याची मानसिकता ठेवली नसल्याचे सांगत आज (ता. १५) विद्यापीठात व्यवस्थापन परिषदेच्या बैठकीच्या पार्श्वभूमीवर शिक्षक आणि पदवीधर सिनेट सदस्यांनी फोर्ट संकुलासमोर जोरदार आंदोलन केले. आंदोलनकर्त्या सिनेट सदस्यांसोबत प्राध्यापकांना पोलिसांनी तत्काळ ताब्यात घेऊन आझाद मैदान पोलिस ठाण्यात नेऊन त्यांची सुटका केली.
व्यवस्थापन परिषदेच्या बैठकीत सदस्यांकडून ऐनवेळी काही मुद्दे मांडण्याचा प्रयत्न केला, परंतु त्यावर प्रशासनाने ऐकूण घेतले नसल्याने याविरोधात ‍शिक्षक आणि पदवीधर सिनेट सदस्यांसोबत बुक्टो आणि युवासेनेच्या पदाधिकाऱ्यांनी फोर्ट संकुलाच्या मुख्य प्रवेशद्वारावर आंदोलन छेडले. विद्यापीठातील विविध प्रश्नांवर बॅनर झळकवत आणि घोषणाबाजी करताच विद्यापीठ प्रशासनाने पोलिसी बळाचा वापर करून आमचे हे आंदोलन मोडीत काढल्याचा आरोप आंदोलनकर्त्या सिनेट सदस्यांसोबत बुक्टो आणि युवासेनेच्या प्रमुख पदाधिकाऱ्यांनी केला. त्‍यामुळे आम्हाला पोलिसांच्या मदतीने आझाद मैदानात घेऊन गेले, यात अनेक वरिष्ठ प्राध्यापकांनाही मानसिक त्रासाला सामोरे जावे लागले असल्याचे बुक्टोंकडून सांगण्यात आले.
काही दिवसांपूर्वीच एका विद्यार्थी संघटनेने असेच आंदोलन केले असताना ते आंदोलन मोडीत काढले गेले नाही अथवा पोलिसी बळाचाही वापर करण्यात आला नाही, परंतु आमचे आंदोलन मोडीत काढून विद्यापीठ प्रशासनाने दुजाभाव केल्याचा आरोप सिनेट सदस्य प्रदीप सावंत यांनी केला.
या धरणे आंदोलनात युवासेनेचे सिनेट सदस्य शशिकांत झोरे, अल्पेश भोईर, किसन सावंत आणि माजी सिनेट सदस्य राजन कोळंबेकर यांनी प्रत्यक्ष सहभाग घेतला होता, तर बुक्टू या संघटनेच्या ज्येष्ठ नेत्या डॉ. तप्ती मुखोपाध्याय, प्रा. मधू परांजपे, प्रा. शांती पोलिमोरी, अनुपमा सावंत, ज्योती पेटकर, स्वाती लावंड, डॉ. चंद्रशेखर कुळकर्णी, डॉ. जितेंद्रनाथ झा, प्रा. डॉ. हनुमंत सुतार, सखाराम डाखोरे, डॉ. सोमनाथ कदम, ताहीर मोहम्मद,उत्तम यादव, शरद त्रिपाठी आदी प्राध्यापकांनी सहभाग घेतला होता.