शालेय सहलीसंदर्भात शासनाच्या निर्णयाची अंमलबजावणी करा
मनसे विद्यार्थी सेनेचे सानपाडा येथील खासगी शाळांना निवेदन
तुर्भे, ता. १७ (बातमीदार) ः शालेय सहल काढण्यासंदर्भात महाराष्ट्र शासनाच्या निर्णयाची अंमलबजावणी करण्याबाबत नुकतेच महाराष्ट्र नवनिर्माण विद्यार्थी सेनेच्या वतीने सानपाडा विभागातील खासगी शाळांना निवेदन देण्यात आले आहे. महाराष्ट्र नवनिर्माण विद्यार्थी सेनेकडून शाळांना देण्यात आलेल्या निवेदनासोबत महाराष्ट्र शासनाच्या निर्णयाच्या अंमलबजावणीची प्रत जोडण्यात आली आहे. या वेळी मनसेचे सानपाडा विभाग अध्यक्ष व महाराष्ट्र नवनिर्माण विद्यार्थी सेनेचे सानपाडा विभाग सचिव संजय कदम, महाराष्ट्र सैनिक शशिकांत गायकवाड आदी उपस्थित होते.
शालेय सहल काढण्यासंदर्भात महाराष्ट्र शासनाच्या निर्णयाची कठोरपणे अंमलबजावणी करण्याबाबत खासगी शाळांना मनसे विद्यार्थी सेनेच्या वतीने सूचना देण्यात आल्या अन्यथा खासगी शाळा आणि मनसे विद्यार्थी सेना यांच्यात भविष्यात संघर्ष अटळ राहील, असा इशारा मनसेचे सानपाडा विभाग अध्यक्ष व महाराष्ट्र नवनिर्माण विद्यार्थी सेनेचे नवी मुंबई उपशहर अध्यक्ष योगेश शेटे यांनी दिला. महाराष्ट्र नवनिर्माण विद्यार्थी सेनेने निवेदन दिलेल्या शाळांमध्ये रायन इंटरनॅशनल स्कूल, सेव्हेंथ डेज स्कूल, साधू वासवानी इंटरनॅशनल स्कूल, जय पुरिया स्कूल, माध्यमिक विद्यालय विवेकानंद संकुल शाळा यांचा समावेश आहे.
................
चौकट
२५ फेब्रुवारी २०२५ रोजी नवी मुंबई महापालिकेच्या घणसोली विभागातील शाळा क्रमांक ७६ तर्फे शालेय सहल काढण्यासंदर्भात महाराष्ट्र शासनाच्या निर्णयाला केराची टोपली दाखवत इमॅजिका वॉटर पार्क येथे शालेय सहलीचे आयोजन करण्यात आले होते. या सहलीदरम्यान एका चौदावर्षीय विद्यार्थ्याचा हृदयविकाराच्या तीव्र झटक्याने दुर्दैवी मृत्यू झाला होता. याबाबत मनसेने नवी मुंबई महापालिका आयुक्त डॉ. कैलास शिंदे यांना या दुर्घटनेसंदर्भात निवेदन देत आयुक्तांच्या दालनाबाहेर ठिय्या आंदोलन केले होते. त्यानंतर महापालिका आयुक्तांनी या प्रकरणावर चौकशी समिती बसवून घटनेस जबाबदार असलेल्या महापालिका शिक्षण उपायुक्त, शिक्षण अधिकारी यांच्या चौकशीचे आदेश दिले आहेत.