भरधाव ट्रकच्या धडकेत बापलेक जखमी

सकाळ वृत्तसेवा
डोंबिवली, ता. १८ : कल्याण येथील दुर्गाडी चौकात शुक्रवारी (ता. १८) सकाळी दहा वाजण्याच्या सुमारास ट्रक आणि दुचाकीचा भीषण अपघात झाला. या अपघातात दुचाकीवरील बापलेक गंभीर जखमी झाले असून त्यांना खासगी रुग्णालयात उपचारासाठी दाखल करण्यात आले आहे. मनोहर शिवराम तांबे (वय ५७) आणि प्रज्ञा मनोहर तांबे (वय २६) अशी जखमींची नावे आहेत. या अपघातप्रकरणी बाजारपेठ पोलिसांनी ट्रकचालकास ताब्यात घेतले आहे.

पोलिसांनी दिलेल्या माहितीनुसार, तांबे हे भिवंडी येथे राहणारे असून नोकरीनिमित्त ते दररोज कल्याणला येतात. शुक्रवारी सकाळी ते नेहमीप्रमाणे दुचाकीवरून कामावर जात होते. कल्याण दुर्गाडी चौकात भरधाव वेगात आलेल्या एका ट्रकने त्यांच्या दुचाकीला जोरदार धडक दिली. या अपघातात ट्रकच्या चाकाखाली आल्याने बाप-लेकीच्या पायाला गंभीर दुखापत झाली आहे. या वेळी घटनास्थळी उपस्थित असलेल्या नागरिकांनी तत्परता दाखवत दोघांनाही तातडीने जवळच्या खासगी रुग्णालयात उपचारासाठी दाखल केले. या अपघाताची माहिती मिळताच कल्याण शहर वाहतूक पोलिस आणि बाजारपेठ पोलिसांनी घटनास्थळी धाव घेत ट्रकचालकाला ताब्यात घेतले. या अपघातामुळे काही काळ दुर्गाडी परिसरात वाहतूक कोंडी निर्माण झाली होती. याप्रकरणी पुढील तपास सुरू असून पोलिसांनी ट्रकचालकाविरुद्ध गुन्हा नोंदवण्याची प्रक्रिया सुरू केली आहे.