भाईंदर, ता. २१ (बातमीदार) : मिरा-भाईंदर शहरात वाढत असलेल्या वाहांच्या रहदारीमुळे मोठ्या प्रमाणात वाहतूक कोंडी होत आहे. यासाठी महापालिकेने ‘होम @ २०’ हा उपक्रम राबवणार आहे. त्यासाठी तब्बल ७२ कोटींचा खर्च येणार आहे. हा निधी राज्य सरकारच्या विविध योजना, तसेच कॉर्पोरेट कंपन्यांच्या सीएसआर निधीतून उभारण्याचा महापालिकेचा विचार आहे.

मुंबईतून मिरा-भाईंदर शहरात येण्यासाठी सध्या दहिसर चेकनाक्यावरून गर्दीच्या वेळी किमान पाऊण तास लागतो. यात प्रामुख्याने जागोजागी सिग्नल लागणे, तसेच कोंडी नेमकी कोणत्या भागात आहे, याची माहिती नसणे, यामुळे नागरिकांचा वेळ वाया जातो. दहिसर चेकनाका ते भाईंदर पश्चिम येथील नेताजी सुभाषचंद्र बोस मैदान हे अंतर सुमारे आठ किमी आहे. हे अंतर २० मिनिटांत कापणे शक्य आहे, मात्र कोंडीमुळे हे शक्य होत नाही, यासाठी महापालिकेने ‘होम @ २०’ उपक्रम राबविण्याचा निर्णय घेतला आहे.

दहिसर चेकनाक्यावरून मिरा-भाईंदर शहरात येण्यासाठी चार रस्ते आहेत. यात दहिसर चेकनाका, अजित पॅलेस, पेणकर पाडा, मिरा रोड रेल्वेस्थानकावरून नयानगर व उड्डाणपुलावरून भाईंदर पश्चिम हा पहिला रस्ता आहे, तर काशी-मिरा येथील शिवाजी चौक ते गोल्डन नेस्ट हा दुसरा, एमआयडीसी-डेल्टा गार्डन रस्ता हा तिसरा आणि वेस्टर्न हॉटेल, हटकेश मार्गे गोल्डन नेस्ट अशा चार मार्गांचा समावेश आहे. या चारही मार्गांच्या आसपास मोठ्या प्रमाणात रहिवासी संकुले उभी राहिली आहेत. परिणामी वाहनांची संख्याही वाढली असून, त्यातून कोंडी होते.

या कोंडीचा शास्त्रशुद्ध पद्धतीने अभ्यास करून नागरिकांना भाईंदर पश्चिम येथील नेताजी सुभाषचंद्र बोस मैदानापर्यंत २० मिनिटांत पोहोचण्यासाठी काय उपाययोजना करायच्या, याचा आराखडा महापालिकेने तयार केला आहे. त्यानुसार ३९ नाक्यांची सुधारणा करणे, चौकांचे रुंदीकरण, रस्ते रुंदीकरण, दुभाजक सुव्यस्थित करणे, सिग्नल यंत्रणा सक्षम करणे, तसेच इंटिलेजंट ट्रॅफिक मॉनिटरींग सिस्टीम (आयटीएमएस) यंत्रणा बसविणे ही कामे करण्यात येणार आहे.

आयुक्तांकडून खर्चासाठी मान्यता
महापालिकेची सध्या आर्थिक स्थिती चांगली नसल्याने या संपूर्ण प्रकल्पाला तांत्रिक मान्यता घेतल्यानंतर राज्य सरकारच्या विविध योजनांमधून निधी मिळवण्यासाठी प्रयत्न केला जाणार आहे. यात नगरोत्थान अभियान, नावीन्यपूर्ण उपक्रम, मित्रा, महाप्रित, एमआयसीबी, राष्ट्रीय हवा सुधारणा कार्यक्रम या उपक्रमांचा समावेश आहे. याव्यतिरिक्त बहुराष्ट्रीय कंपन्यांच्या सीएसआर निधीसाठी प्रयत्न केले जाणार आहेत. या उपक्रमाला येणाऱ्या खर्चाला आयुक्त राधाबिनोद शर्मा यांनी नुकतीच मान्यता दिली आहे.

रस्ते रुंदीकरण व अन्य कामे ४३ कोटी

आयटीएमएस यंत्रणा बसविण्यासाठी २८ कोटी