भाईंदर, ता. २६ (बातमीदार) : मिरा-भाईंदर महापालिकेच्या क्रीडासंकुलातील तरण तलावात ११ वर्षीय मुलाचा मृत्यू झाला होता. याप्रकरणी महापालिका आयुक्तांनी चौकशी समिती नियुक्त केली आहे. या समितीला अहवाल सात दिवसांत सादर करायचा आहे. त्यानंतर आयुक्त निर्णय घेणार आहेत.

भाईंदर पूर्व येथील लोकनेते गोपीनाथ मुंडे क्रीडासंकुलातील तरण तलावात ग्रंथ मुथा याचा मृत्यू झाला होता. यावरून शहरात संतापाचे वातावरण आहे. क्रीडासंकुलाच्या संचालनासाठी महापालिकेने कंत्राटदाराची नियुक्ती केली आहे; परंतु कंत्राटदाराने बेकायदा उपकंत्राटदाराची नियुक्ती केल्याचा आरोप केला जात आहे. त्यामुळे मुलाच्या मृत्यूप्रकरणी कंत्राटदारसह उपकंत्राटदारावर गुन्हा दाखल करण्यात यावा, तसेच क्रीडासंकुलाचे कंत्राटही रद्द करण्यात यावे, अशी मागणी केली जात आहे. ग्रंथचे वडील हसमुख मुथा व अन्य कुटुंबीयांनी नुकतीच आयुक्त राधाबिनोद शर्मा यांची भेट घेऊन कठोर कारवाईची मागणी केली. या पार्श्वभूमीवर संपूर्ण प्रकरणाची चौकशी करण्यासाठी आयुक्तांनी समिती स्थापित केली आहे.

अतिरिक्त आयुक्त डॉ. संभाजी पानपट्टे, शहर अभियंता दीपक खांबित, तसेच समाजविकास अधिकारी दीपाली पवार यांचा या समितीत समावेश आहे. तरण तलावाचा आकार काय होता, मुलांना प्रशिक्षण दिले जात असलेल्या ठिकाणी खोली किती होती, प्रशिक्षित व अनुभवी प्रशिक्षकांची नेमणूक करण्यात आली होती का, जीवरक्षक पुरेशा प्रमाणात होते का, मुख्य कंत्राटदारने उपकंत्राटदाराची नियुक्ती केली होती का, अशा विविध मुद्द्यांवर ही समिती चौकशी करणार आहे, तसेच या घटनेच्या सीसीटीव्ही फुटेजचाही अभ्यास समिती करणार आहे.