डम्परच्या चाकाखाली चिरडून कामगाराचा मृत्यू
पनवेल, ता. २६ (वार्ताहर) : तळोजा घोट गाव येथील सिडकोच्या घनकचरा प्रक्रिया प्रकल्पामध्ये कचरा घेऊन आलेल्या एका डम्परच्या चाकाखाली आलेल्या कामगाराचा मृत्यू झाल्याची घटना गुरुवारी (ता. २४) सकाळी घडली. तळोजा पोलिसांनी या अपघाताला जबाबदार असलेल्या डम्परचालकाविरोधात गुन्हा दाखल करून त्याला ताब्यात घेतले आहे.
अपघातातील मृत कामगाराचे नाव धर्मा बाळाराम पाटील (वय ५५) असे असून, ते सिद्धी करवले गावात कुटुंबासह राहत होते. तसेच ते सिडकोच्या नागरी घनकचरा प्रक्रिया व व्यवस्थापन प्रकल्पामध्ये सफाई कामगार म्हणून काम करीत होते. धर्मा पाटील हे गुरुवारी सकाळी नेहमीप्रमाणे आपल्या कामावर गेले होते. या वेळी कचरा घेऊन आलेला डम्पर वजन करण्यासाठी उभा होता. वजन केल्यानंतर हा डम्परचालकाने पाठीमागे कुणी उभा आहे का, याची खातरजमा न करता आपला डम्पर निष्काळजीने मागे (रिव्हर्स) घेतला. याचवेळी पाठीमागे उभा असलेला कामगार धर्मा पाटील हा डम्परच्या चाकाखाली आल्याने त्याचा जागीच मृत्यू झाला. या घटनेनंतर डम्परचालकाने त्या ठिकाणावरून पलायन केले. याप्रकरणी तळोजा पोलिसांनी चालकाविरोधात गुन्हा दाखल करून त्याला अटक केली.