‘क्लस्टर’विरोधात रणशिंग
मानपाड्यात नोंदणी क्रमांकांवर स्‍थानिकांनी फासला पांढरा रंग
सकाळ वृत्तसेवा
ठाणे, ता. २५ : मानपाडा, आझादनगर, मनोरमानगर येथील प्रस्तावित क्लस्टर डेव्हलपमेंटविरोधात (समूह विकास) स्थानिकांनी रणशिंग फुंकले आहे. राष्ट्रवादी शरद पवार गटाच्या नेतृत्वाखाली स्थानिकांनी आपल्या घरावर टाकलेल्या नोंदणी क्रमांकाला पांढरा रंग फासण्यास सुरुवात केली आहे. विरोध असतानाही प्रशासन क्लस्टर लादत असल्याचा आरोप येथील स्थानिकांनी केला असून, त्याला पाठिंबा आमदार जितेंद्र आव्हाड यांनी दर्शविला आहे.
आशिया खंडातील सर्वात मोठी क्लस्टर योजना ठाण्यात राबविली जात आहे. अनधिकृत धोकादायक इमारतींमध्ये राहणाऱ्या रहिवाशांना हक्काचे घर मिळावे, हा या क्लस्टरचा मुख्य हेतू होता. पण आता क्लस्टरच्या नावाने पालिका प्रशासनाने मनमानी सुरू केली असल्याचा आरोप होऊ लागला असून, अनेक ठिकाणी त्याला विरोध दर्शवला जात आहे. एसआरए, पुनर्विकासाच्या मार्गावर असलेल्या आणि म्हाडा भूखंडावरील रहिवाशांनी याआधीच क्लस्टरविरोधात भूमिका घेतली आहे. त्यात आता मानपाडा, मनोरमानगर, आझादनगर आदी परिसराचीही भर पडली आहे. या परिसरात ठाणे महापालिकेकडून क्लस्टर डेव्हलपमेंट (समूह विकास) योजना राबविण्याची प्रक्रिया सुरू केली आहे. स्थानिक नागरिकांचा विरोध असतानाही ही योजना राबविण्यात येत असून, जानेवारीत येथील शाळांवर हातोडा चालविण्यात आला. प्रशासनाकडे विरोध नोंदवूनही क्लस्टरसाठी जबरदस्ती लादली जात असल्याने आमदार डॉ. जितेंद्र आव्हाड यांनी शनिवारी (ता. २६) मानपाडा परिसराला भेट दिली.

क्लस्टर योजना बिल्डरधार्जिणी : आव्हाड
स्थानिकांचा विरोध पाहता आमदार आव्हाड यांनीही आक्रमक भूमिका घेत सर्वप्रथम क्लस्टरसाठी घराबाहेर टाकण्यात आलेले नोंदणी क्रमांक पुसण्याचे आव्हान रहिवाशांना केले. आव्हाड यांनी काही घरांची नोंदणी पुसल्यानंतर इतर रहिवाशांनीही नोंदणी क्रमांकावर पांढरा रंग फासला. ‘घरावर आलात तर शिंगावर घेऊन भिरकावून देऊ. क्लस्टर योजनाच बिल्डरधार्जिणी आहे. ती आम्ही उधळून लावणारच आहोत. मानपाड्यात पडलेली ही ठिणगी आता शहरभर पसरणार आहे,’ असा इशारात आव्हाड यांनी दिला.