मुरबाड, ता. ७ (वार्ताहर)ः कृषी विभागाच्या होऊ घातलेल्या आकृतीबंधामध्ये कृषी सहाय्यकांच्या पदोन्नतीचा प्रश्न सोडविण्यासह इतर मागण्यांकडे लक्ष वेधण्यासाठी राज्यातील कृषी सहाय्यक संघटनेने सोमवारपासून आंदोलन पुकारले आहे. त्यानुसार महाराष्ट्र कृषी सहाय्यक संघटना मुरबाड शाखा तालुका अध्यक्ष यांच्या मार्गदर्शनाखाली तालुका कृषी अधिकारी, मुरबाड कृषी सहाय्यक कर्मचाऱ्यांनी एकदिवसीय धरणे आंदोलन केले.
कृषी सहाय्यकांची ११,५२७ पदे अस्तित्वात असून, कृषी पर्यवेक्षकांची ७०० पदेही मंजूर आहेत. त्यामुळे कृषी सहाय्यकांना सेवेची २० ते २५ वर्षे झाल्यानंतर ही पदोन्नती मिळणार नाही. सद्यःस्थितीत कृषी सहाय्यक, पर्यवेक्षक यांचे प्रमाण ६:१ आहे. हे ४:१ याप्रमाणे करण्यात येणे आवश्यक असून, त्या मागणीसाठी आंदोलन सुरू असल्याचे मंडलिक यांनी सांगितले. त्याचबरोबर कृषी सेवकांचा कालावधी रद्द करून कृषी सहाय्यकपदाचे आदेश द्यावे, कृषी सहाय्यकांना लॅपटॉप देण्यात यावेत, कायमस्वरूपी मदतनीस द्यावा, कृषी निविष्ठा वाटपाची सुसूत्रता आणावी, अशी मागणी करण्यात आली. तसेच मागण्या पूर्ण झाल्या नाहीत तर सामूहिक रजा आंदोलनातून कामकाजावर बहिष्कार टाकण्यात येणार आहे.