वासिंद, ता. ७ (बातमीदार) : परिसरात रात्री नऊच्या सुमारास वादळी वाऱ्याने अचानक थैमान घातल्याने बाजारपेठेत आलेल्या नागरिकांची चांगलीच तारांबळ उडाली. परिसरातील काही भागात झाडे पडल्याने विद्युत पुरवठा रात्रभर बंद ठेवण्यात आला होता. तर अचानक पडलेल्या पावसामुळे शेतकऱ्यांसह वीटभट्टी मालकांचे आर्थिक नुकसान झाले.
वासिंद परिसरात सायंकाळपासूनच वातावरणात बदल जाणवत होता. रात्री अचानक सोसाट्याचा वारा सुटला. दहागाव, गेरसे, कोसले, भातसई गावात बहुतेक शेतकरी उन्हाळी भाजीपाल्याची लागवड करीत असतात. तर कातबावसारख्या बहुतेक आदिवासीवाडीवर गावठी कोंबडी, गाय, म्हैस, पशुपालन केले जाते. पशुसाठी ठेवलेल्या चाऱ्यासह फळझाडांचेदेखील नुकसान झाले. वीटभट्टीवर काम करणाऱ्या कामगारांनी बांधलेली गवताची घरे पाण्यात भिजल्याने रात्र जागून काढावी लागली. कच्ची वीट वाचविण्यासाठी त्यांची चांगलीच तारांबळ उडाली.
---------------------------
गटारांमधील घाण रस्त्यावर
पिवळी येथील दत्ता तांबे यांच्या घरावर आंब्याचे झाड कोसळले. यात कोणतीही जीवितहानी झाली नसली तरी घराचे पत्रे तुटून नुकसान झाले. वासिंद पूर्वेकडील दोन इमारतींचे पत्रे उडाले. बाजारपेठेत अर्धवट गटारांच्या बांधकामामुळे संपूर्ण घाण रस्त्यावर पसरली होती.