विजेच्या धक्क्याने एका व्यक्तीसह तीन म्हशींचा मृत्यू

कल्याण, ता. ७ (बातमीदार) : कल्याण तालुक्यातील जांभूळ गावात सोसाट्याच्या वाऱ्यामुळे कोसळलेल्या विजेच्या तारांच्या संपर्कात आल्याने एका व्यक्तीचा मृत्यू झाला आहे, तर दुर्दैवाने त्यांच्या तीन म्हशींचाही त्याच विजेच्या धक्क्याने मृत्यू ओढावल्याची दुर्दैवी घटना बुधवारी (ता. ७) रोजी सकाळी घडली. या दुर्दैवी घटनेनंतर महावितरणच्या पावसाळ्यापूर्वीच्या ढिसाळ नियोजनावर ग्रामस्थांकडून नाराजी व्यक्त केली जात आहे.

जांभूळचे ग्रामस्थ आणि या तीन म्हशींचे मालक अनंता मधुकर आयरेकर होते. सर्वप्रथम विजेच्या तारेच्या संपर्कात त्यांची एक म्हैस आली. त्यांना आपल्या म्हशीला विजेचा धक्का बसल्याचे कळल्यावर तिला वाचवण्यासाठी त्यांनी धाव घेतली; मात्र तिला वाचवण्यासाठी गेलेल्या अनंता मधुकर आयरेकर यांनाही विजेचा धक्का बसला. त्यात त्यांचा मृत्यू झाला, अशी माहिती जांभूळचे सरपंच परिक्षित पिसाळ यांनी दिली. यानंतर त्यांच्या इतर दोन म्हशींनाही विजेचा धक्का बसला. या म्हशीसुद्धा त्याच विजेच्या तारेच्या संपर्कात आल्या होत्या. बुधवारी जांभूळ गावात ही घटना घडली. यामुळे आयरेकर कुटुंबासह संपूर्ण गावावर शोककळा पसरली असून, एकाच घटनेत तीन म्हशींसह त्यांच्या मालकाचा मृत्यू झाल्याने अनेक जण शोक व्यक्त करत आहेत.

दरम्यान, याची माहिती संबंधित महावितरण अधिकाऱ्यांना देण्यात आली आहे, असेही सरपंच पिसाळ यांनी सांगितले आहे. यापूर्वीही काही घटनांमध्ये पावसाळ्यात उघड्या पडलेल्या विजेच्या तारांचा धक्का लागल्याने पाळीव प्राण्यांचा आणि व्यक्तींचा जीव गेलेला आहे. त्यामुळे अशा धोकादायक विजेच्या खाबांचे लेखापरीक्षण करून तातडीने कमकुवत खांबही बदलावेत, अशी मागणी केली जाते आहे. आता दुर्दैवी घटनेनंतर महावितरणला पान्हा फुटून खांबांच्या अवस्थेकडे तरी किमान लक्ष देईल, अशी आशा ग्रामस्थांकडून व्यक्त होत आहे.