भिवंडी, ता. ८ (वार्ताहर)ः भिवंडी पालिका क्षेत्रातील नालेसफाई नेहमीच वादाच्या भोवऱ्यात सापडलेली आहे. याच पार्श्वभूमीवर पालिका आयुक्त अनमोल सागर यांनी नालेसफाईच्या कामावर नियंत्रण ठेवण्याकरिता प्रभागनिहाय पथकांची नियुक्ती केली आहे.
पालिकेने यंदा प्रभाग समितीनिहाय शहरातील सर्व बंदिस्त व उघड्या स्वरूपाचे लहान-मोठे १३५ नाल्यांची सफाई केली जाणार आहे. यासाठी स्वतंत्र ठेकेदार नियुक्त केले आहेत. तसेच नालेसफाईच्या कामांवर मुख्यालयस्तरावरून नियंत्रण, दैनंदिन देखरेखीसाठी अधिकाऱ्यांची नियुक्ती केली आहे. तसेच सहाय्यक आयुक्त, उपायुक्त, अतिरिक्त आयुक्तांसह स्वतः आयुक्त अचानक भेटी देऊन कामाची पाहणी करणार आहेत. तसेच दिरंगाई अथवा जाणीवपूर्वक हलगर्जी आढळल्यास ठेकेदारांविरोधात नियमांनुसार दंडात्मक कारवाई केली जाणार आहे. याशिवाय नालेसफाईची कामे करताना ठेकेदाराने सफाई कामगारांना सर्व सुरक्षाविषयक साधने पुरविणे आणि कामगारांनी वापरणे बंधनकारक केली आहेत. या वेळी अतिरिक्त आयुक्त देवीदास पवार, सहाय्यक आयुक्त शैलेश दोंदे, आरोग्य विभागाचे फैजल तातली, जे. एम. सोनवणे उपस्थित होते.
-----------------------------------------------
सुरक्षासाहित्य देण्याची सूचना
आयुक्त अनमोल सागर यांनी सफाई कामगारांना सुरक्षा साहित्य देण्याच्या सूचना दिल्या. तसेच दैनंदिन कामाचे जिओ टॅग फोटो पालिका प्रशासनाला सादर करणे ठेकेदारावर बंधनकारक केले आहे.