कांदिवलीत खोदकामामुळे वाहतूक कोंडी
रस्‍त्‍यांच्या कामाचे बॅरिकेड्स हटवण्याकडे दुर्लक्ष
कांदिवली, ता. ८ (बातमीदार) ः कांदिवली पश्चिमेत स्वामी विवेकानंद मार्गावर प्रचंड वाहतूक कोंडी होत आहे. पालिकेचे ठेकेदार, अधिकारी यांचे रस्‍त्‍यांच्या कामांच्या ठिकाणचे बॅरिकेड्स हटवण्याकडे दुर्लक्ष होत असल्‍याने कोंडीचा त्रास सहन करावा लागत असल्‍याचा आरोप वाहनचालक करीत आहेत.
रेल्‍वेस्‍थानक रोडला छेदणाऱ्या मार्गावरील जीवनदास मटानी सिग्नल चौकाच्या बाजूलाच काम केलेल्या ठिकाणी लोखंडी बेरिकेड्स उभे करण्यात आले आहेत. या बेरिकेड्समुळे अडथळा होत असल्‍याने वाहतुकीची कोंडी होते. संपूर्ण शहरामध्ये सध्या सुरू असलेल्‍या खाेदकामामुळे अशीच परिस्‍थिती निर्माण झाली आहे.
मथुरादास मार्ग हा स्वामी विवेकानंद मार्गाला छेदून कांदिवली रेल्‍वेस्‍थानकाकडे जातो. छेद मार्गाजवळ जीवनदास मटानी चौकाजवळ सिग्नल आहे. चौकाच्या अलीकडे चर खोदून केबल टाकण्याचे काम पूर्ण झाले, मात्र कामाच्या ठिकाणी लावण्यात आलेला लोखंडी बेरिकेड्स तसाच ठेवण्यात आला आहे. मार्गाच्या कोपऱ्यावर तसेच सिग्नलच्याआधी सुरक्षिततेसाठी ठेवण्यात आलेला लोखंडी बेरिकेड्स असुरक्षित, वाहतुकीच्या कोंडीस कारणीभूत ठरत आहे.
यासंदर्भात विचारणा केली असता आर दक्षिण विभागातील कनिष्‍ठ अभियंता यांनी सांगितले की, याबाबत संबंधित अधिकाऱ्यांना सांगून बॅरिकेड्स हटवण्यात येतील.