सानपाडा एक सीट ३०० रुपये; रिक्षाचालकांकडून प्रवाशांची लूट
ट्रान्स हार्बरवरील रेल्वेसेवा ठप्प
सकाळ वृत्तसेवा
ठाणे, ता. ९ : ठाणे-पनवेल ट्रान्स हार्बर मार्गावरील रेल्वेसेवा ठप्प झाल्याने प्रवाशांची रेल्वेस्थानकासह रस्त्यावर मोठी गर्दी दिसून आली. या वेळी प्रवाशांच्या गैरसोयीचा फायदा घेत रिक्षाचालकांकडून लूट सुरू होती. ठाणे ते सानपाडा जाण्यासाठी ३०० रुपये सीट याप्रमाणे दर आकारणी करत असल्याची बाब समोर आली आहे.
ठाणे-ऐरोली यादरम्यान गर्डर वाकल्यामुळे ट्रान्स हार्बर मार्गावरील रेल्वे वाहतूक ठप्प झाली होती. नवी मुंबईत मोठ्या प्रमाणात आयटी कंपन्या, अनेक राष्ट्रीय अंतरराष्ट्रीय कंपन्या व त्यांचे कॉलसेंटर आहेत. त्यामुळे लाखोंच्या संख्येने प्रवासी नवी मुंबईकडे कामानिमित्त जात असतात. शुक्रवारी (ता. ९) ऐन सकाळीच ट्रान्स हार्बर मार्गावरील रेल्वे वाहतूक ठप्प झाली होती. यामुळे प्रवाशांचे मोठे हाल झाले, तर प्रवाशांच्या गैरसोयीचा फायदा घेत रिक्षाचालकांकडून लूट सुरू होती. ठाणे ते सानपाडा या ठिकाणी जाण्यासाठी ३०० रुपये प्रती प्रवासी मागणी करत असल्याचे दिसून आले, तर त्यापुढे जाण्यासाठी ४०० ते ५०० रुपयांची मागणी करताना दिसून आले.

ठाणे विभागाकडून जादा गाड्यांचे नियोजन
ट्रान्स हार्बर मार्गावरील रेल्वे वाहतूक ठप्प झाली होती. या वेळी प्रवाशांची गैरसोय होऊ नये यासाठी ठाणे पालिकेच्या परिवहन विभागाने विशेष खबरदारी घेत जादा गाड्यांचे नियोजन केले होते. त्यामुळे नवी मुंबईत प्रवास करणाऱ्या प्रवाशांची ठाणे सॅटीस पुलावर गर्दी दिसून आली. ठाणे ते घणसोली आणि तुर्भे या मार्गावर टीएमटीने १० जादा गाड्या सोडल्या होत्या. या मार्गावर टीएमटीने १८ फेऱ्यांचे नियोजन करण्यात आले असल्याची माहिती परिवहन व्यवस्थापक भालचंद्र बेहरे यांनी दिली.