पावसाळ्यानंतर एपीएमसीची निवडणूक घ्या
कल्याण, ता. ११ (वार्ताहर) : अवकाळी पाऊस आणि देशातील युद्धजन्य परिस्थितीच्या पार्श्वभूमीवर कल्याण एपीएमसी मार्केटची निवडणूक सहा महिन्यांनंतर घेण्यात यावी, अशी मागणी लक्ष्मी मार्केट भाजीपाला संघटनेने केली आहे.
बाजार समितीतील संचालक मंडळाचा कार्यकाळ संपल्यानंतर बेकायदा तीन वेळा मुदतवाढ घेण्यात आली. अखेर पणन मंडळाने सद्यस्थितीत बाजार समितीवर प्रशासक नेमल्याने समिती मंडळाच्या भ्रष्टाचार नियंत्रणात आणला. तसेच भ्रष्टाचारावर पांघरूण घालण्यासाठी समितीने निवडणुका घेण्याचा डाव रचला आहे. राज्य सहकार निवडणूक प्राधिकरणाने निवडणूक घेण्याच्या हालचाली सुरू केल्या आहेत. बाजार समितीच्या निवडणुकीसंदर्भात व्यापारी यादी, माथाडी यादी, शेतकरी मतदार यादी, ग्रामपंचायत यादी बनविण्याचे काम सुरू केले आहे. या याद्यांमध्ये मोठ्या प्रमाणावर घोळ केल्याने याद्यांची अद्यापही पूर्णत: पूर्तता झालेली नाही. अशात निवडणूक प्रक्रियेला जोरदार सुरुवात झाली आहे. जोपर्यंत मतदार याद्या व अन्य निवडणुकीसंदर्भात पूर्तता होत नाही, तोपर्यंत काही काळ प्रशासकीय राजवट ठेवावी, कल्याण बाजार समितीची निवडणूक घेऊ नये, अशी मागणी सचिव राज्य सहकार निवडणूक प्राधिकरण, पणन संचालक महाराष्ट्र राज्य, खासदार सुरेश म्हात्रे, आमदार रवींद्र चव्हाण यांना निवेदनाद्वारे करणार असल्याची माहिती लक्ष्मी मार्केट भाजीपाला व्यापारी संघटनेचे सचिव रामदास यादव, उपाध्यक्ष रफिक तांबोळी, गोविंद गौतम यांनी दिली.