सकाळ वृत्तसेवा
ठाणे, ता. ११ : ठाणेकरांना भेडसावणाऱ्या विविध समस्यांबाबत पालिका मुख्यालयात आमदार संजय केळकर यांनी पालिका अधिकाऱ्यांची बैठक घेतली होती. या वेळी शहरातील आवश्यक ठिकाणी विद्युत रोहित्र तसेच उपकेंद्रासाठीची जागा महापालिका उपलब्ध करून देणार असल्याची माहिती त्यांनी दिली. त्यामुळे भविष्यात शहराला अखंडित तसेच पुरेशा वीजपुरवठ्यात येणाऱ्या अडचणी मार्गी लागण्याची शक्यता आहे.
शहरात काही ठिकाणी नागरिकांना नाहक अपुऱ्या वीजपुरवठ्याचा फटका बसत आहे. विद्युत रोहित्रे, तसेच उपकेंद्रांअभावी भेडसावत असल्याने जिल्हा नियोजन समितीच्या माध्यमातून आवश्यक निधी देण्यासाठी प्रयत्न सुरू आहेत. याच अनुषंगाने बुधवारी महापालिका मुख्यालयात अधिकाऱ्यांची बैठक घेताना तातडीने जागा उपलब्ध करून देण्याचे निर्देश अधिकाऱ्यांना दिले. त्यानुसार गावदेवी, हरीनिवास आणि मनोरमानगर भागात येत्या १५ दिवसांत पालिका महावितरणला जागा उपलब्ध करून देणार आहे. याबरोबरच इलेक्ट्रिक वाहनांसाठीच्या चार्जिंग स्टेशनलादेखील जागा देण्याबाबत चर्चा झाली. त्यानुसार शहरात ३० ठिकाणी सुविधा उपलब्ध करून देण्याचे आश्वासन अधिकाऱ्यांनी दिले.
------------------------------------------
बैठकीतील महत्त्वाचे मुद्दे
- उच्च न्यायालयाने बेकायदा बांधकामांवरून महापालिकेला दोन वेळा दंड सुनावला आहे. यावरून अधिकाऱ्यांना कारवाईची इच्छाच राहिली नसून न्यायालयाच्या शिक्षेची वाट पाहात असल्याचे केळकर म्हणाले. त्यामुळे नागरिकांच्या तक्रारीनुसार अशा बांधकामांवर कारवाईचे आदेश दिले गेले.
- रस्ता रुंदीकरणासाठी नागरिकांनी महापालिकेला त्यांच्या जागा दिल्या असताना त्याच जागेवर फेरीवाल्यांचे अतिक्रमण कसे होऊ शकते. रखडलेल्या ढोकाळी-कोलशेत मार्गाचे काम पुन्हा सुरू झाले असले तरी हा रस्ता ठेवावा, अशी मागणी या वेळी करण्यात आली.