पोलिसांच्या मदतीला पालिकेचे वॉर्डन
रस्ते कामांमुळे वाहतूक नियोजनासाठी मदत
ठाणे शहर, ता. ११(बातमीदार) : ठाणे महापालिकेसह इतर सहा महापालिकांच्या हद्दीत रस्त्यांची कामे सुरू आहेत. या कामामुळे वाहतूक नियोजनाचा मोठा भार वाहतूक पोलिसांच्या खांद्यावर आहे. त्यांचा वाहतुकीचा भार काहीसा कमी व्हावा, यासाठी मेट्रो, एमएमआरडीए, एमएसआरडीसी, सार्वजनिक बांधकाम विभाग आणि महापालिकांच्या वॉर्डनची मदत त्यांना पुरवण्यात आली आहे. ५९४ जणांची कुमक वाहतूक पोलिसांच्या सोबतीला उभी केली असून, त्यातील सर्वाधिक मदत ठाणे महापालिकेकडून पुरवण्यात आली आहे.

ठाणे महापालिकेने वाहतूक नियोजनाचा मोठा भार आपल्या खांद्यावर घेतला आहे. ठाणे महापालिकेच्या परिक्षेत्रात मोठ्या प्रमाणात मुख्य रस्त्यांसह सेवा रस्ते, मेट्रोची कामे सुरू आहेत. पैकी घोडबंदर मार्गावर कामाची आणि वाहतुकीची व्याप्ती मोठी असल्याने या मार्गावर प्रचंड प्रमाणात वाढ होते. ही कोंडी फोडून वाहतुकीचे योग्य नियोजन करण्याचे काम ठाणे वाहतूक पोलिसांकडून केले जाते. या कामासाठी ठाणे महापालिकेमार्फत वाहतूक पोलिसांच्या मदतीला १३१ वॉर्डनचे मनुष्यबळ पुरवले आहे. ठाणे महापालिकेच्या हद्दीतील विविध मार्गांचा कामासाठी मेट्रो, सार्वजनिक बांधकाम विभाग, एमएमआरडीए आणि एमएसआरडीसी यांनी १५३ जणांना वाहतूक पोलिसांच्या मदतीला तैनात केले आहे. इतरही महापालिकेने वाहतूक पोलिसांना मनुष्यबळाची मदत केल्याने रस्त्यावरील वाहतुकीचे नियोजन करणे वाहतूक पोलिसांसाठी काहीसे सुलभ होत आहे.

भिवंडी महापालिकेची टाळाटाळ
ठाणे वाहतूक विभागाच्या परिक्षेत्रात येणाऱ्या मिरा-भाईंदर, उल्हासनगर, कल्याण- डोंबिवली, ठाणे आदी महापालिकांनी त्यांच्या हद्दीतील वाहतुकीच्या नियोजनासाठी मनुष्यबळ उभे केलेले असताना भिवंडीने मात्र याकडे दुर्लक्ष केले आहे. वाहतूक विभागाकडून भिवंडी शहरातील वाहतूक नियोजनासाठी वारंवार वॉर्डनची मागणी करूनही ती देण्यास टाळाटाळ केली जात असल्याचे समजते.

ठाणे महापालिकेचे निर्देश
ठाणे महापालिकेने वाहतुकीच्या नियोजनाकडे विशेष लक्ष दिले असून, वाहतूक पोलिसांच्या मदतीला सर्वाधिक वॉर्डन पुरवले आहेत. यासोबतच पालिका आयुक्त सौरभ राव यांनी मॉल, सोसायट्या, खासगी रुग्णालयांना त्यांच्या परिसरातील वाहतूक कोंडी सोडविण्यासाठी स्वतःची यंत्रणा उभी करण्याचे निर्देश दिले आहेत.

इतर संस्थांचीही मदत
सार्वजनिक बांधकाम विभाग, मेट्रो, एमएमआरडीए, एमएसआरडीसी आणि एमएसएफचीही मदत मिळाली आहे. या संस्थांनी वाहतुकीच्या नियोजनासाठी १७८ जणांचे मनुष्यबळ दिले आहे.

महत्त्वाच्या ठिकाणी, नाक्यांवर वॉर्डनची मदत घेतली जाते. वॉर्डनसोबत एक अंमलदार कर्तव्यावर असतो. काम सुरू असलेल्या ठिकाणीदेखील हे वॉर्डन नियुक्त केलेले असतात. रोजचे त्यांचे नियोजन वाहतूक विभागाकडून केले जाते.
- पंकज शिरसाट, उपायुक्त वाहतूक विभाग, ठाणे

वाहतूक उपविभाग आणि वॉर्डनसंख्या
कासारवडवली - ८६
कापुरबावडी - ४४
वागळे इस्टेट - ३६
कोपरी - ११
मुंब्रा - २५
कळवा - ३६
नौपाडा - २७
ठाणे नगर - १९