पैसे भरलेल्या ४१ हजार ग्राहकांना वीजजोडणीची प्रतीक्षा
महावितरणच्या कारभाराबाबत नाराजी
सकाळ वृत्तसेवा
मुंबई, ता. १२ : महावितरणच्या नाकर्तेपणाचा अनेक नवीन वीजजोडणीच्या प्रतीक्षेत असलेल्या औद्योगिक, वाणिज्य आणि घरगुती वीजग्राहकांना फटका बसत आहे. राज्यभरातील तब्बल ४१ हजार १९९ ग्राहकांनी नवीन वीजजोडणी मिळावी म्हणून महावितरणकडे अर्ज करतानाच पैसेही भरले आहेत. संबंधितांना वीजजोडणी देण्यासाठी कोणतेही नवीन इन्फ्रास्ट्रक्चर उभारावे लागणार नसतानाही विलंब होत असल्याने ग्राहकांकडून महावितरणच्या काराभाराबाबत नाराजी व्यक्त होत आहे.
मुंबई वगळता महावितरणकडे वीज वितरणाचा परवाना आहे. त्यामुळे राज्यातील कोणत्याही ग्राहकाला वीजजोडणी हवी असेल, तर ती महावितरणकडून घेण्याशिवाय पर्याय नाही. या मक्तेदारीमुळे महावितरणच्या अधिकाऱ्यांकडून मनमानी कारभार सुरू असल्याचे दिसते. सोमवार (ता. ५)पर्यंत नवीन वीजजोडणीसाठी आवश्यक असलेल्या कागदपत्रांची पूर्तता करतानाच त्याबाबतचे शुल्क भरलेल्या ग्राहकांची संख्या ४१ हजारांहून अधिक आहे. दरम्यान, महावितरणने २३ एप्रिल ते ५ मे या कालावधीत २० हजार ७०८ ग्राहकांना वीजजोडणी दिली आहे, परंतु कोणत्याही त्रुटींशिवाय वीजजोडणीसाठी अर्ज केलेला असतानाही महावितरणकडून ती दिली जात नाही. त्यामुळे तेवढ्या विजेची विक्री होऊ शकत नसल्याने महावितरणचे नुकसान होत आहे.

कुठे किती ग्राहक वीजजोडणीच्या प्रतीक्षेत
कोकण विभाग - १५ हजार ७८८
नागपूर विभाग - १३ हजार २३९
पुणे विभाग - ८ हजार ४०८
छत्रपती संभाजीनगर विभाग - ३ हजार ७६४