यारी दोस्ती ग्रुपकडून निराधार ताईला मदतीचा हात
समाजकार्य करण्याची आवड असेल तर आपण श्रीमंत असणे आवश्यक नाही - सुधीर भोईर
वाणगाव, ता. १३ (बातमीदार): समाजसेवेत सक्रिय असलेल्या ‘यारी दोस्ती फाउंडेशन’कडून डहाणू तालुक्यातील वानगाव विरे येथील मंजुळा गोवारी या निराधार ताईला मदतीचा हात दिला. यारी दोस्ती ग्रुपने ताईला किराणा किट आणि चटई अशी छोटीशी मदत म्हणून दिली. या ताईला आधार देणारे कोणीही नाही. त्यामुळे त्यांना जगण्यासाठी मोठा संघर्ष करावा लागत आहे. या कठीण परिस्थितीत मदतीचा हात पुढे करत, यारी दोस्ती ग्रुपच्या सदस्यांनी त्यांच्या घरी जाऊन जीवनावश्यक वस्तूंची मदत केली.
यारी दोस्ती ग्रुपमधील सदस्य हे नेहमीच सामाजिक कार्यात पुढाकार घेत असतात आणि कोणत्याही मोबदल्याची अपेक्षा न ठेवता निःस्वार्थपणे गरजूंसाठी कार्य करतात. यारी दोस्ती ग्रुपचा उद्देश गरजूंना मदत करणे, खेडोपाड्यात शैक्षणिक उपक्रम राबवणे, रक्तदान करणे, युवा मार्गदर्शन हा आहे. ताईने या मदतीबद्दल यारी दोस्ती ग्रुपच्या सदस्यांचे आभार मानले. यारी दोस्ती ग्रुपने दाखविलेल्या मदतीने त्यांना थोडासा दिलासा मिळाला आहे. समाजकार्य करण्याची आवड असेल, तर आपण श्रीमंत असणे आवश्यक नाही, आपले मन मोठे असणे महत्त्वाचे आहे, असा संदेश यारी दोस्ती ग्रुपच्या वतीने देण्यात आला आहे.