गुटखाविक्रीसाठी आलेल्या दुकलीला अटक
एक लाख रुपयांचा गुटखा जप्त
सकाळ वृत्तसेवा
ठाणे,ता. १४ : प्रतिबंधित असलेल्या गुटख्याची चारचाकी वाहनातून विक्रीसाठी आलेल्या आयुष निगम (वय २२) आणि शिवम निगम (२२) या दुकलीला वागळे गुन्हे शाखा युनिट ५ ने अटक केली. त्यांच्याकडून एक लाख ४१ हजार ९५० रुपये किमतीचा गुटखा आणि आठ लाखांची गाडी असा नऊ लाख ४१ हजार ९५० रुपयांचा मुद्देमाल जप्त केला आहे.
वागळे इस्टेट रोड नंबर २१ येथील बॉबे बिअर कंपनीसमोरील सार्वजनिक रोड येथे १३ मे रोजी दोन जण चारचाकी गाडीतून प्रतिबंधित गुटख्याची पोती विक्रीसाठी येणार असल्याची माहिती गुन्हे शाखा वागळे युनिट ५ चे वरिष्ठ पोलिस निरीक्षक सलील भोसले यांना मिळाली होती. त्यानुसार सापळा रचून लोकमान्य नगर येथे राहणाऱ्या दुकलीला ताब्यात घेतले. याप्रकरणी वागळे इस्टेट पोलिस ठाण्यात गुन्हा दाखल करून त्यांना अटक केली. याप्रकरणी पुढील तपास पोलिस उपनिरीक्षक तुषार माने करत आहेत. ही कारवाई पोलिस उपायुक्त (गुन्हे) अमरसिंह जाधव यांच्या मार्गदर्शनाखाली सहा. पोलिस आयुक्त शोध १ ( गुन्हे ) शेखर बागडे, गुन्हे शाखा घटक ५ वागळे ठाणे चे वरिष्ठ पोलिस निरीक्षक सलील भोसले, पोलिस उपनिरीक्षक तुषार माने, पोलिस हवालदार विजय काटकर, सुनील निकम, पोलिस नाईक शेळके या पथकाने केली आहे.