भिवंडी, ता. १५ (वार्ताहर)ः ठाणे जिल्ह्यातील आदिवासी समाजाचा आर्थिक स्तर उंचावण्यासाठी आदिम आधार आदिवासी ग्रामीण बिगरशेती सहकारी पतसंस्थेची स्थापना करण्यात आली आहे. या पतसंस्थेच्या अध्यक्षपदी शिवसेना ठाकरे गटाचे भिवंडी ग्रामीण विधानसभा प्रमुख महादेव घाटाळ तर उपाध्यक्षपदी सुनील झळके यांची बिनविरोध निवड करण्यात आली आहे.
भिवंडी तालुक्यातील भिनार येथील आदिम आधार आदिवासी ग्रामीण बिगरशेती सहकारी पतसंस्थेच्या संचालकपदाची निवडणूक नुकतीच झाली. संस्थेच्या संचालकपदी महादेव घाटाळ, चंद्रकांत जाधव, श्याम म्हसकर, जयराम पाटील, किशोर वाडेकर, सुनील झळके, प्रमिला भावर, वैष्णवी शेलार, शिवनाथ नाईक, दत्तात्रय पवार यांची बिनविरोध निवड झाली. या निवडीनंतर १३ मे रोजी सहकार संस्थांचे सहाय्यक निबंधक गजेंद्र कुमावत यांच्या अध्यक्षतेखाली अध्यक्षपदी महादेव घाटाळ तर उपाध्यक्षपदासाठी सुनील झळके यांची बिनविरोध निवड करण्यात आली.
--------------------------------------------
उद्दिष्ट साध्य करणार
आदिवासी समाजबांधवांना समाजाच्या मुख्य प्रवाहात आणण्यासाठी स्वयंरोजगारासाठी प्रोत्साहित करावे, या उद्देशाने पतसंस्थेची स्थापना करण्यात आली आहे. ही पतसंस्था आपले उद्दिष्ट नक्कीच साध्य करेल, असा विश्वास नवनिर्वाचित अध्यक्ष महादेव घाटाळ यांनी व्यक्त केला आहे.