झाड पडून चार घरांचे नुकसान
कळवा, ता. १६ (बातमीदार) : खारेगाव येथे चाळीच्या भिंतीवर झाड कोसळल्याने चार घरांवरचे सिमेंटचे पत्रे फुटून नुकसान झाले. येथील विमलनगरमधील किरपाल बाग सोसायटीजवळ असलेल्या चाळीवर शुक्रवारी (ता. १६) सकाळच्या सुमारास झाड कोसळले. चाळीतील रहिवासी महादेव गायकवाड, सीयाराम यादव, रवींद्र गायकवाड व अनिल गायकवाड यांच्या खोलीच्या पत्र्यावर झाडाच्या मोठ्या फांद्या पडल्याने खोलीला लावण्यात आलेले सिमेंटचे पत्रे फुटले. झाड कोसळल्याची माहिती मिळताच आपत्ती व्यवस्थापन कक्षाच्या कर्मचाऱ्यांनी व अग्निशमन दलाच्या जवानांनी घटनास्थळी धाव घेत परिस्थिती आटोक्यात आणली. यात कोणत्याही प्रकारची जीवितहानी झाली नाही.