टीबी विभाग कर्मचाऱ्यांच्या प्रलंबित मागण्या पूर्ण करा
म्युनिसिपल कर्मचारी कामगार सेनेची मागणी
मुलुंड, ता. १७ (बातमीदार) ः मुंबई महापालिकेच्या क्षयरोग (टीबी) विभागातील कर्मचाऱ्यांच्या प्रलंबित मागण्या पूर्ण करा, अशी मागणी म्युनिसिपल कर्मचारी कामगार सेनेने केली आहे. अध्यक्ष बाबा कदम यांच्या नेतृत्वाखालील शिष्‍टमंडळाने पालिका कार्यकारी आरोग्य अधिकारी दक्षा शाह यांची भेट घेतली.
या शिष्टमंडळात सत्यवान गावकर, हेमंत कदम आणि संजय वाघ यांचा समावेश होता. कर्मचाऱ्यांना दोन महिन्यांपासून वेतन न मिळाल्यामुळे त्यांनी ३ मेपासून ऑनलाईन कामबंद आंदोलन सुरू केले होते. त्‍यानंतर एक महिन्याचे वेतन मिळाले, मात्र उर्वरित वेतन लवकरात लवकर मिळावे. मागील सहा महिन्यांपासून प्रलंबित सानुग्रह अनुदान (दिवाळी बोनस) त्वरित मिळावा, अशी कर्मचाऱ्यांची प्रमुख मागणी आहे.
दक्षा शाह यांनी राज्य सरकारकडून वेळेवर निधी उपलब्ध न झाल्यामुळे वेतन वितरणात अडथळा आल्याचे स्पष्ट केले. मात्र संबंधित प्रस्ताव अतिरिक्त आयुक्तांकडे पाठविण्यात आल्याचे सांगत लवकरच निर्णय होण्याची शक्यता व्यक्त केली. याशिवाय वरिष्ठ उपचार प्रयोगशाळा पर्यवेक्षक पदांवरील वाढत्या कामाच्या ओझ्याच्या पार्श्वभूमीवर थेट प्रयोगशाळा तंत्रज्ञ भरतीसाठी पालिका शासनाकडे परवानगी मागणार असल्याचेही त्यांनी नमूद केले.
टीबी विभाग कर्मचाऱ्यांच्या सर्व मागण्यांवर चर्चा करण्यासाठी विभागप्रमुखांच्या उपस्थितीत लवकरच बैठक घेण्यात येईल, अशी माहिती शाह यांनी दिली. दिवाळी बोनससाठीचा प्रस्तावही कार्यवाहीसाठी प्रशासनाकडे पाठवण्यात आला आहे.