सकाळ वृत्तसेवा
डोंबिवली, ता. १८ : कल्याण, डोंबिवलीमध्ये अनेक नोकरदार खासगी सुरक्षा एजन्सीच्या माध्यमातून सुरक्षारक्षक म्हणून काम करतात. काही एजन्सींनी आपल्या आस्थापनेवरील तैनात सुरक्षारक्षकांना अनेक महिने वेतन दिलेले नाही. आज ना उद्या वेतन मिळेल, म्हणून ते काम करत आहेत. खासगी सुरक्षा एजन्सी अशा सुरक्षारक्षकांची दखल घेत नसल्याने अनेक जण काम सोडून देतात. अशा प्रकारे खासगी सुरक्षारक्षकांची पिळवणूक करणाऱ्या दोषी एजन्सींवर कठोर कारवाई करण्यासाठी पुढाकार घ्यावा, अशी मागणी डोंबिवलीतील शिंदे शिवसेनेचे ज्येष्ठ कार्यकर्ते सदानंद थरवळ यांनी पोलिस उपायुक्त अतुल झेंडे यांच्याकडे केली आहे.
कल्याण, डोंबिवली परिसरातील औद्योगिक विभाग, मोठी गृहसंकुले, खासगी आस्थापना, उद्याने, बगिचे, धर्मस्थळे अशा अनेक ठिकाणी काही खासगी सुरक्षा एजन्सी सुरक्षारक्षकांचा पुरवठा करतात. त्यांचे वेतन नियुक्त करणारी आस्थापना, कंपनी थेट एजन्सीच्या बँक खात्यावर जमा करते किंवा त्यांना सर्व सुरक्षारक्षकांच्या एकत्रित वेतनाचा धनादेश दिला जातो. या रकमेचे वाटप करण्याचे काम सुरक्षा एजन्सीच्या प्रमुखावर असते. अलीकडे काही सुरक्षा एजन्सी मूळ मालकांकडून सुरक्षारक्षकांचे वेतन ताब्यात घेतात. ते वेतन सुरक्षारक्षकांना दोन ते चार महिने वाटप करत नाहीत. एक दिवस तरी वेतन मिळेल या आशेवर सुरक्षारक्षक उसनवारी करून घरगाडा चालवतो. अंगावरील कर्ज, उसनवारीचा डोंगर वाढत गेला की तो कोठून फेडायचा, असा प्रश्न निर्माण झाल्यावर काही जण अन्य ठिकाणी मिळेल त्या कामासाठी जातात. अन्याय झालेले खासगी सुरक्षारक्षक पोलिस ठाण्यात तक्रार दाखल करण्यासाठी गेल्यास त्याची दखल घेत नाहीत, असे ज्येष्ठ कार्यकर्ते थरवळ यांनी पोलिस उपायुक्त झेंडे यांच्या निदर्शनास आणले आहे.

तक्रारी दाखल करण्याच्या सूचना
डोंबिवलीत अलीकडे एक ते दोन प्रकार घडल्याचे आणि ते सुरक्षा रक्षक आपल्याकडे या संदर्भातची तक्रार घेऊन आले होते, असे थरवळ यांनी सांगितले. अशीच परिस्थिती वाहतूक विभागात वाहतूक सेवक म्हणून काम करणाऱ्या सेवकांची आहे. पोलिस उपायुक्तांनी अशा अन्यायग्रस्त कर्मचाऱ्यांच्या तक्रारी दाखल करून घेण्याच्या सूचना निवेदनाद्वारे केल्या आहेत.