पोलादपूर, ता. १९ (बातमीदार) ः मुंबई-गोवा महामार्गावरील कशेडी घाटातील बोगदा गुरुवारपासून (ता. १५) पूर्ण क्षमतेने वाहतुकीसाठी खुला झाला आहे. बोगदा सुरू झाल्याने सुट्टीसाठी कोकणात गावी जाणाऱ्या चाकरमान्यांचा प्रवास जलद, सुरक्षित होईल. पोलादपूर बाजूचा वीजपुरवठा कार्यान्वित झाला आहे. रत्नागिरी बाजूचा पुरवठा१५ दिवसांत सुरू होईल, अशी माहिती राष्ट्रीय महामार्ग विभागाचे अभियंता पंकज गोसावी यांनी दिली.
दोन्ही बोगद्यांतील अंतर्गत गळती दुरुस्त करण्याचे काम सुरू आहे. १५ मेपासून बोगद्यातून पूर्ण क्षमतेने वाहतूक सुरू आहे. कशेडी घाट बोगदा दोन किलोमीटर लांबीचा असून, त्याला जोडणाऱ्या रस्त्यांसह संपूर्ण मार्ग सुमारे नऊ किलोमीटरचा आहे. यामुळे ४० ते ४५ मिनिटांचा वळसा वाचून अवघ्या १० ते १५ मिनिटांत रायगडमधील पोलादपूर ते रत्नागिरीतील खेडमधील कशेडीपर्यंतचा प्रवास शक्य झाला आहे.
बोगद्यात दोन्ही बाजूंनी २०० पथदीपांची उभारणी करण्यात येणार आहे. त्यासाठी आवश्यक यंत्रसामग्री उपलब्ध झाली असून, बहुतांश कामही पूर्ण झाले आहे. त्यामुळे सुट्टीच्या कालावधीत कोकणातील जाणारा प्रवास अधिक सुरक्षित होणार आहे.

अखंडित वीजपुरवठा
काही दिवसांत बोगद्यात २४ तास अखंड वीजपुरवठा सुरू होणार आहे. उन्हाळ्यातील गळती रोखण्यासाठी ग्राउंटिंग तंत्रज्ञानाचा वापर करण्यात येणार आहे. बोगद्यातील कामे अंतिम टप्प्यात असून, सुरक्षितता आणि प्रकाशव्यवस्था अधिक चांगली करण्यावर भर देण्यात येणार असल्‍याची माहिती राष्ट्रीय महामार्ग विभागाचे अभियंता पंकज गोसावी यांनी दिली आहे.