जिल्ह्यातील अल्पशिक्षितांना शासकीय नोकरीची संधी
वाणगाव, ता. १९ (बातमीदार) : डॉ. बाळासाहेब सावंत कोकण कृषी विद्यापीठ, दापोली अंतर्गत कृषी संशोधन केंद्र, पालघर (नंदीशाळा) येथे एक वर्ष मुदतीचा बागकाम तंत्रज्ञान प्रमाणपत्र अभ्यासक्रम सुरू करण्यात आला आहे. या अभ्यासक्रमासाठी प्रवेश प्रक्रिया लवकरच सुरू होणार असल्याने स्थानिक तरुण-तरुणींना या संधीचा लाभ घेण्याचे आवाहन कृषी संशोधन केंद्राचे बागकाम कृषी अधिकारी महेश मुनगेकर यांनी केले आहे.
सध्या पालघर व बोईसर पट्ट्यासह डहाणू-विक्रमगड परिसरात हजारो छोटे-मोठे कारखाने आहेत. प्रदूषण रोखण्यासाठी पर्यावरणाचे संतुलन राखण्यासाठी बागबगीचे व प्रदूषण रोखणारी झाडे लावण्यात येणार आहेत. परिसरातील मोठ्या प्रमाणात व्यापारी व रहिवासी संकुलाची निर्मितीही सुरू आहे. पालघर जिल्हा निर्मितीमुळे मोठ्या प्रमाणात औद्योगिक व गृहसंकुल बांधकाम वाढले आहे, त्यामुळे त्यांनाही बागबगीचांची निर्मिती करावी लागत असल्याने मोठ्या प्रमाणात स्थानिकांना रोजगाराची संधी निर्माण झाली आहे. त्यासाठी स्थानिक तरुण-तरुणींनी बाग काम तंत्रज्ञानाचे ज्ञान घेणे आवश्यक आहे. त्‍यानुसार कृषी संशोधन केंद्राच्या या अभ्यासक्रमामध्ये विद्यार्थ्यांना शोभिवंत झाडे, फुलझाडे, हंगामी झाडे, वार्षिक- बहुवार्षिक झाडे यांची लागवड, फळझाडांची लागवड, बागबगीचा, हिरवळ तयार करणे, भाजीपाला पिकांची लागवड, रोग कीड नियंत्रण, मसाला पिकांची लागवड, रोपवाटिका व्यवस्थापन, बोन्साय तयार करणे, विविध प्रकारची कलमे तयार करणे इत्यादींचे लेखी व प्रात्यक्षिक स्वरूपात प्रशिक्षण दिले जाणार आहे. हे प्रशिक्षण यशस्वीरित्या पूर्ण केल्यावर डॉ. बाळासाहेब सावंत कोकण कृषी विद्यापीठ, दापोली यांचे विद्यार्थ्यांना गुणपत्रक व प्रमाणपत्रसुद्धा देण्यात येणार आहे.
...................
प्रवेश पात्रता काय आहे?
उमेदवार किमान नववी पास किंवा दहावी पास/ नापास असणे आवश्यक आहे. तसेच त्याचे वय किमान १४ ते ४५ वर्ष यापेक्षा कमी असावे. या अभ्यासक्रमाचे प्रवेश अर्ज कृषी संशोधन केंद्र, पालघर (नंदीशाळा) येथे उपलब्ध होणार आहेत.

नोकरी व व्यवसायाची संधी
१) स्वयंरोजगार शासकीय/ निमशासकीय खात्यात ‘माळी’ म्हणून नोकरीची संधी
२) स्वतः रोपवाटिका सुरू करून व्यवसाय
३) खासगी कंपन्यांमध्ये बांधकाम तंत्रज्ञ म्हणून नेमणुकीची संधी
४) बाग कामांची ठेकेदारीची कामे
५) मुक्त विद्यापीठामार्फत पुढील शिक्षणाची संधी