आचोळेमध्ये पाणथळ जागेवर अनधिकृत बांधकाम
विरार, ता. १९ (बातमीदार) ः वसई-विरार महापालिका क्षेत्रात मोठ्या प्रमाणात अनधिकृत बांधकाम वाढले असून, यामुळे प्रशासनाचे मोठ्या प्रमाणात आर्थिक नुकसान होत आहे, तर अशाच प्रकारे आचोळे येथील पाणथळ जागेवर अनधिकृत बांधकाम वाढले असून, त्‍यावर कारवाई करण्यात यावी, अशी मागणी जिल्हाधिकाऱ्यांकडे मॅकेन्झी डाबरे यांनी पत्राद्वारे केली आहे.
वसई तालुक्यातील नालासोपारा ते बसई रेल्वे लाइनदरम्यान आचोळे येथील सर्व्हे नंबर ४६ या पर्यावरणदृष्ट्या अतिसंवेदनशील नैसर्गिक पाणथळ जागेवर काही समाजकंटकांकडून बेसुमार अनधिकृत भराव टाकण्यात येत आहे. या जागेवर बेकायदा रस्ता बनवून पाणथळ जागा पूर्णतः नष्ट करण्याचा प्रयत्न सुरू आहे. सोबतच नैसर्गिक नाल्याचा मार्ग बदलून त्यामध्ये कुठलीही शासकीय परवानगी न घेता सिमेंट काँक्रीटचे बांधकाम राजरोस सुरू आहे. विशेष म्‍हणजे येथील पाणथळ व ना विकास क्षेत्र असलेल्या जागेवर लाखो ब्रास अनधिकृत भराव व बांधकाम सुरू असताना आचोळे विभागातील मंडळ अधिकारी व तलाठी डोळेझाक करीत असल्याने स्‍थानिकांकडून नाराजी व्‍यक्‍त केली जात आहे. नुकतेच याप्रकरणी न्यायालयातदेखील धाव घेण्यात आली आहे. शिवाय येथील नैसर्गिक पाणथळ व ना विकास क्षेत्रामधील अनधिकृत भराव व अनधिकृत बांधकाम तत्काळ बंद करण्याचे आदेश देण्यात यावेत, अशा मागणीचे पत्र जिल्हाधिकाऱ्यांकडे मॅकेन्झी डाबरे यांनी दिले आहे.