पावसाळ्यात अखंडित वीजपुरवठा उपलब्ध करा
आमदार विलास तरे यांच्या महावितरणच्या अभियंत्यांना सूचना
मनोर, ता. २० (बातमीदार) ः बोईसर विधानसभा क्षेत्रातील ग्रामीण भागातील वीजपुरवठ्याबाबत असलेल्या समस्यांचा आढावा घेण्यासह पावसाळ्यात अखंडित वीजपुरवठा उपलब्ध करून उपाययोजना करण्यासाठी महावितरण कंपनीच्या अभियंत्यांसोबत आमदार विलास तरे यांची बैठक पार पडली. सोमवारी सकाळी महामार्गावरील ढेकाळे येथील जनसंपर्क कार्यालयात पार पडलेल्या बैठकीत वीजपुरवठ्याबाबत असलेल्या समस्येची माहिती घेऊन उपाययोजना करण्याचे निर्देश आमदार विलास तरे यांनी अभियंत्यांना दिले.
ग्रामीण भागात वारंवार खंडित होणारा वीजपुरवठा, वारंवार निर्माण होणाऱ्या तांत्रिक अडचणी, ट्रान्स्फॉर्मरमध्ये होणारे बिघाड, कमी दाबाने होणारा वीजपुरवठा, लोडशेडिंग आणि वीजपुरवठा सुरळीत करण्यासाठी दुरुस्ती कामात होणारा विलंब तसेच पावसाळापूर्व तयारी आदींबाबत महावितरण कंपनीच्या अभियंत्यांनी आमदारांनी माहिती दिली. वीज वितरण आणि बिलासंबंधित वीजग्राहकांच्या तक्रारीचा वेळेत निपटारा करा, पावसाळ्यात ग्रामीण भागात पुरेशा दाबाने वीजपुरवठा सुरळीत ठेवण्यासाठी आवश्यक उपाययोजना करा, गरज असलेल्या ठिकाणी नवीन ट्रान्स्फॉर्मर उपलब्ध करून देण्यासाठी मागणीचे प्रस्ताव सादर करावे तसेच पावसाळ्यात निर्माण होणारे तांत्रिक बिघाड तातडीने दुरुस्त करण्यासाठी स्वतंत्र यंत्रणा कार्यान्वित करण्याच्या सूचना आमदार विलास तरे यांनी महावितरण कंपनीच्या अभियंत्यांना दिल्या. ग्रामीण भागातील वीजग्राहकांना अखंडित वीजपुरवठा उपलब्ध करून देण्यासाठी वेळीच उपाययोजना करणे, महावितरण कंपनीची जबाबदारी असल्याचे मत आमदार विलास तरे यांनी व्यक्त केले. बैठकीत महावितरण कंपनीचे पालघर विभागाचे कार्यकारी अभियंता सुनील भारंबे, उपविभागीय अभियंता रवींद्र देहारे, शाखा अभियंता तसेच शिवसेना शिंदे गटाचे स्थानिक पदाधिकारी उपस्थित होते.
...............