८१ वर्षीय महिलेचे अवयवदान
सकाळ वृत्तसेवा
मुंबई, ता. २४ : ८१ वर्षीय एका महिलेचा मेंदू मृत झाल्यानंतर तिच्या कुटुंबाने तिचे अवयवदान करण्याचा निर्णय घेतला. या अवयवदानातून तीन गरजूंना नवीन जीवन मिळाले. यावर्षी मुंबईत मृत व्यक्तीचे अवयवदान होण्याची ही १९ वी घटना आहे.
वृद्ध महिलेची प्रकृती बिघडल्यानंतर त्यांना नवी मुंबईतील एमजीएम रुग्णालयात दाखल करण्यात आले. उपचारादरम्यान त्यांची प्रकृती खालावली आणि डॉक्टरांनी त्यांना ब्रेनडेड घोषित केले. त्‍यानंतर कुटुंबाचे समुपदेशन करून त्यांना अवयवदानासाठी प्रोत्साहित करण्यात आले. कुटुंबाने अवयवदान करण्यास सहमती दर्शवली. झोनल ट्रान्सप्लांट कोऑर्डिनेशन कमिटीकडून मिळालेल्या माहितीनुसार, वृद्ध महिलेचे यकृत आणि दोन्ही मूत्रपिंड प्रत्यारोपणाच्या प्रतीक्षेत असलेल्या गरजू रुग्णांना पाठवण्यात आले.