पावसाळी आपत्कालीन परिस्थितीसाठी यंत्रणा सज्ज
कल्याण, ता. २४ (वार्ताहर) : कल्याण-डोंबिवली महापालिकेची यंदा पावसाळ्याच्या पार्श्वभूमीवर आपत्कालीन मनपा यंत्रणा सज्ज आहे. आपत्कालीन परिस्थितीत महापालिकेची यंत्रणा जलद गतीने राबविण्यात यावी, या दृष्टिकोनातून आयुक्त अभिनव गोयल यांच्या मार्गदर्शनाखाली अधिकारी, कर्मचारीवर्गाला आचार्य अत्रे रंगमंदिर येथे प्रशिक्षणदेखील देण्यात आले, अशी माहिती आपत्कालीन व्यवस्थापन विभागाचे उपायुक्त संजय जाधव यांनी दिली आहे.

पावसाळ्यामध्ये आपत्कालीन परिस्थितीत नागरिकांना भेडसावणाऱ्या समस्या सोडविण्यासाठी आयुक्तांच्या निर्देशानुसार महापालिकेच्या १० प्रभागांत आपत्ती व्यवस्थापन केंद्र उभारले आहेत. या ठिकाणी सहाय्यक आयुक्तांच्या अधिनस्त सर्व संबंधित विभागातील अधिकारी, कर्मचारी यांची नेमणूक केली आहे. त्याचप्रमाणे प्रत्येक प्रभागातील आपत्कालीन परिस्थितीवर पर्यवेक्षण व नियंत्रण ठेवण्यासाठी नोडल अधिकारी म्हणून प्रभागनिहाय उपायुक्त वर्गाची नेमणूक केली आहे.

टोल फ्री क्रमांक उपलब्ध
महापालिका मुख्यालयातही (आपत्कालीन) मुख्य नियंत्रण कक्ष कार्यान्वित केला असून, हा कक्ष ३० ऑक्टोबरपर्यंत कार्यरत राहणार आहे. हा मुख्य नियंत्रण कक्ष सकाळी ६ ते दुपारी २, दुपारी २ ते रात्री १० आणि रात्री १० ते सकाळी ६ या तीन सत्रात सुरू राहणार आहे. या मुख्य नियंत्रण कक्षावर रात्रीच्या सत्रात पर्यवेक्षण करण्यासाठी वर्ग एक व वर्ग दोनच्या अधिकाऱ्यांची नेमणूक करण्यात आली आहे. नागरिकांच्या सुविधेसाठी महापालिका मुख्यालयातील मुख्य नियंत्रण कक्षात १८००२३३७३८३ आणि १८ ००२३३४३९२ हे टोल फ्री क्रमांक उपलब्ध करण्यात आले आहेत.