प्लॅस्टिक प्रदूषण निर्मूलनाचा संकल्प
पर्यावरणदिनाच्या पूर्वतयारीची नियोजन बैठक
कल्याण, ता. २५ (वार्ताहर) : कल्याण-डोंबिवली महापालिकेच्या स्थायी समिती सभागृहात आयुक्त अभिनव गोयल यांच्या अध्यक्षतेखाली जागतिक पर्यावरणदिनाच्या अनुषंगाने नुकतेच बैठकीचे आयोजन केले होते. यंदा जागतिक स्तरावर प्लॅस्टिक प्रदूषणाचे निर्मूलन ही संकल्पना आहे. या पार्श्वभूमीवर पर्यावरण, वन आणि हवामान बदल मंत्रालय यांनी २२ मे ते ५ जून या कालावधीत देशभरात जनजागृतीसाठी विशेष मोहीम राबविण्याचे निर्देश दिले आहेत, त्यामुळे फक्त प्रतीकात्मक झाडे लावणे किंवा प्लॅस्टिक निर्मूलन याव्यतिरिक्त क्षेत्रनिहाय, नागरिकांच्या सहभागाने वेळापत्रकाची आखणी करावी, तसेच दस्तऐवजीकरणासह एक संपूर्ण मोहीम राबवावी, असे निर्देश महापालिका आयुक्त अभिनव गोयल यांनी या बैठकीत दिले. झाडे लावण्याचे क्षेत्रनिहाय नियोजन करून त्याची तारीखनिहाय अंमलबजावणी करावी, यात नागरिकांच्या सक्रिय सहभागावर भर द्यावा, असे निर्देश त्यांनी दिले.

पर्यावरण मोहीम वेगवेगळ्या अभिनव पद्धतीने राबविण्यात येणार आहे. यामध्ये प्रत्येक महिन्यात त्या-त्या महिन्याच्या संकल्पनेस अनुरूप उपक्रम राबविण्याचे नियोजन करावे, असे निर्देश त्यांनी या बैठकीत दिले. तसेच सर्व शाळांचे शिक्षक व मुख्याध्यापकांना आमंत्रित करून हे उपक्रम शाळांमध्येही राबवावेत, जेणेकरून विद्यार्थ्यांमध्ये पर्यावरणीय जाणीव निर्माण होईल असेही ते पुढे म्हणाले. शैक्षणिक व पर्यावरणीय दोन्ही दृष्टिकोनातून उपयुक्त ठरेल, असे ‘सीड्स बँक’ प्रदर्शन सार्वजनिक ठिकाणी लावण्याची संकल्पनादेखील या बैठकीत उपस्थितांतर्फे मांडण्यात आली.

नागरिकांचा सहभाग महत्त्वाचा
कल्याण-डोंबिवली महानगरपालिकेतर्फे पर्यावरणदिन साजरा करताना केवळ प्रतीकात्मकता न ठेवता, जास्तीत जास्त नागरिकांच्या ही मोहीम राबविण्याचा संकल्प करावा, असेही निर्देश आयुक्त अभिनव गोयल यांनी या बैठकीत दिले. या वेळी महापालिकेच्या कार्यकारी अभियंता रोहिणी लोकरे आणि उपायुक्त अतुल पाटील यांनी सर्व सहभागी सदस्यांना सोबत घेऊन हा उपक्रम राबविण्यात येणार असल्याचे सांगितले. या बैठकीस पर्यावरण विभागाच्या कार्यकारी अभियंता रोहिणी लोकरे, घनकचरा व्यवस्थापन व पर्यावरण विभागाचे उपायुक्त अतुल पाटील, शिक्षणाधिकारी विजय सरकटे, महापालिकेचे ब्रँड ॲम्बेसेडर डॉ. प्रशांत पाटील तसेच विविध खासगी शाळांचे प्रतिनिधी आणि पर्यावरण क्षेत्रातील स्वयंसेवी संस्थाचे प्रतिनिधी सहभागी झाले होते.