प्लॅस्टिकमुक्त गावासाठी सामूहिक कृती गरजेची
छायादेवी शिसोदे यांचे प्रतिपादन : ठाण्यात स्वच्छ भारत मिशन राबविणार
सकाळ वृत्तसेवा
ठाणे, ता. २४ : प्लॅस्टिकमुक्त गावांची संकल्पना प्रत्यक्षात उतरवण्यासाठी ग्रामपातळीवर सामूहिक कृती गरजेची आहे. पर्यावरणाचा समतोल राखण्यासाठी प्रत्येक नागरिकाने जबाबदारीने सहभागी होणे आवश्यक आहे. ही मोहीम केवळ एक उपक्रम न राहता, प्लॅस्टिकमुक्त ग्राम करण्यासाठी जिल्हा परिषद कटिबद्ध असल्याचे मत मुख्य कार्यकारी अधिकारी छायादेवी शिसोदे यांनी व्यक्त केले.
केंद्र व राज्य शासनाच्या पर्यावरण आणि स्वच्छतेविषयक मार्गदर्शक सूचनांनुसार ठाणे जिल्हा परिषदअंतर्गत ग्रामीण भागात स्वच्छ भारत मिशन (ग्रामीण) अंतर्गत ‘प्लॅस्टिकमुक्त ग्राम’ अभियानाची प्रभावी अंमलबजावणी करण्यात येणार आहे. २२ मे ते ५ जून या कालावधीत विविध उपक्रम राबवून ही मोहीम जनजागृतीपूर्वक पार पाडण्यात येणार आहे. या अभियानाचा शुभारंभ पर्यावरण शपथ घेऊन करण्यात येणार आहे. ग्रामस्थांना अभियानात सक्रिय सहभागासाठी जिल्हा परिषदेमार्फत आवाहन करण्यात येत आहे. या वेळी ग्रामीण पाणीपुरवठा व स्वच्छता विभागप्रमुख प्रमोद काळे यांनी सांगितले की, या मोहिमेंतर्गत प्लॅस्टिकमुक्तीसाठी विविध उपक्रम राबवले जाणार आहेत.
विशेषतः ‘मासिक पाळी व्यवस्थापन दिन’, ‘थीम एक पृथ्वी, एक आरोग्य’ या उपक्रमांद्वारे शाळा, अंगणवाड्या, आरोग्य केंद्रे यामधून महिलांमध्ये स्वच्छतेबाबत जागृती करण्यात येणार आहे. ही मोहीम उपविभागीय अधिकारी, गटविकास अधिकारी, सरपंच, ग्रामसेवक व स्थानिक स्वच्छता समिती यांच्या समन्वयाने यशस्वी करण्यात येणार असल्याचेही या वेळी सांगण्यात आले.

................................
अभियानाचे ठळक वैशिष्ट्ये :
• २२ मे : पर्यावरण शपथ व जनजागृती रॅली
• २८ मे : मासिक पाळी व्यवस्थापन दिन-शाळांमधून किशोरवयीन मुलींसाठी मार्गदर्शन
• २९ मे : ‘थीम एक पृथ्वी, एक आरोग्य’ दिन-योग दिनानिमित्त आरोग्यविषयक उपक्रम
• ग्रामसभा, रॅली, प्रदर्शन, महिला बचत गट, युवक मंडळे यांच्या सहभागातून विविध सर्जनशील उपक्रम

--