शेवळाची भाजी बाजारात दाखल
खवय्यांकडून पसंती; यंदा जुडी महागली
तळा, ता. २४ (बातमीदार) ः तालुक्‍यात मोठ्या प्रमाणात अवकाळी झाल्याने रानावनासह डोंगरकपार चांगले भिजले आहेत. त्‍यामुळे कंदमुळे उगवण्यास सुरुवात झाली आहे. यामध्ये रानात पावसाळ्यात उगवली जाणारी शेवळाची भाजीनेदेखील हजेरी लावली असून, बाजारात विक्रीसाठी आदिवासी बांधवांकडून आणली जात आहे. यंदा ती २५ रुपये जुडी, अशी विकली जात आहे.
मोसमी पावसाआधीच १० मेपासून तालुक्‍यात अवकाळीचा जोर वाढला आहे. त्यामुळे रानावनात डोंगरभागात कंदमुळे बाहेर पडू लागली आहेत. त्याचबरोबर शेवळसुद्धा जंगलात मोठ्या प्रमाणात उगवली आहे. मॉन्सूनमध्ये शेवळा ही रानभाजी महाराष्ट्रामध्ये मोठ्या प्रमाणात उगवली जाते. ती अत्यंत चविष्ट असल्याने खवय्यांकडून तिला पसंती दिली जाते. ही भाजी कोवळी असताना खाल्ली जाते. यावर्षी मेमध्ये मोठ्या प्रमाणात अवकाळी पाऊस झाल्याने यंदा ती लवकर उगवली आहे. त्‍यामुळे बाजारात आदिवासी बांधवांकडून तिला विक्रीसाठी आणली जात आहे. ही भाजी तांबूस रंगाची असून ती दोन ते चार फूट उंचीची असते. एक-दोन दिवस ही कळी उंच होते, त्यानंतर चौथ्या दिवशी ती फुलते. तिचा एक विशिष्ट असा वास येतो. ती कळीवर असताना खूप चविष्ट व रुचकर लागते. ही भाजी साफ केल्यानंतर त्यात नाण्याचा किंवा बोंडग्याचा पाळा टाकून शिजवावी लागते. कढईत तिला चांगली परतावी लागते अन्यथा घशाला खाज सुटते. भाजीला फोडणी देऊन लसूण, हळद, मीठ, मसाला व तिखट-तेल टाकून चांगली शिजवली जाते. ही भाजी भाकरीबरोबर खाताना खूप चविष्ट लागते. यंदा ती २५ रुपये जुडी, अशी विकली जात आहे.