खरीप शेती प्रकियासंदर्भात शेतकऱ्यांना मार्गदर्शन
उरण, ता. २४ (वार्ताहर) ः कृषी विभागातर्फे आमदार महेश बालदी यांच्या अध्यक्षतेखाली उरण पंचायत समिती सभागृहात खरीप आढावा बैठक नुकतीच पार पडली. या वेळी उरण तालुक्यातील कृषी अधिकारी अर्चना सुळ यांनी खरीप हंगाम २०२५चे सादरीकरण व नियोजनाबद्दल माहिती दिली. कृषी विभागातर्फे शेतकऱ्यांना बीज प्रक्रिया, उगवण क्षमता चाचणी तसेच भातपिकाचे विविध वाण याबद्दल प्रदर्शन व सखोल माहिती देण्यात आली. तसेच आमदार महेश बालदी यांनी शेतकऱ्यांच्या विविध समस्या ऐकून घेऊन त्यांना मार्गदर्शन केले. तसेच त्या समस्या सोडविण्याचे आश्वासन दिले. याप्रसंगी उरण विधानसभा मतदारसंघाचे आमदार महेश बालदी, उरण गटविकास अधिकारी समीर वाठारकर, नायब तहसीलदार महेश पाटील, तालुका कृषी अधिकारी अर्चना सुळ, एस. डी. गटकळ, कृषी पर्यवेक्षक बी. वाय. धेंडे, एस. व्ही. लोहकरे, ए. डी. बुरकूल तसेच उरण तालुक्यातील पुरस्कार प्राप्त प्रगतशील शेतकरी, तसेच पीएमएफएमईमधील महिला व्यावसायिक, महिला बचत गट व कृषी सेवा केंद्रधारक, पंजाबराव देशमुख नैसर्गिक शेती अभियान व एफपीओचे सदस्य, असे एकूण ११५ जण उपस्‍थित होते.